Maliyyə

Ana səhifə

Maliyyə

Azərbaycanda pensiya xərcləri 22% artıb

13 sentyabr 2012 13:21 (UTC +04:00)

Bakı. Vahab Rzayev - APA-Economics. İlkin məlumatlara əsasən, 2012-ci ilin yanvar-avqust aylarında Azərbaycan Dövlət Sosial Müdafiə Fondunun (DSMF) gəlirləri 1 624,6 mln. manat təşkil edib ki, bu da 2011-ci ilin müvafiq dövrünə nisbətən 21,5% çoxdur.

Fondun mətbuat xidmətindən “APA-Economics”ə verilən məlumata görə, hesabat dövründə icbari dövlət sosial sığorta haqları üzrə daxilolmalar 2011-ci ilin müvafiq dövrünə nisbətən 15,2% artaraq 891,9 mln. manat təşkil edib.

İcbari dövlət sosial sığorta haqları üzrə daxilolmaların 60,2% qeyri-büdcə sektorunun payına düşür. Həmin sektorun ödədiyi icbari dövlət sosial sığorta haqlarının məbləği əvvəlki ilə nisbətən 18,0% artmış, proqnoz isə 109,2% icra olunub.

Bu dövrdə sahibkarlıq fəaliyyəti ilə məşğul olan fiziki şəxslərin və torpaq pay mülkiyyətçilərinin sosial sığortaya cəlb edilməsi nəticəsində əvvəlki ilin ilk 8 ayının göstəricisi ilə müqayisədə fiziki şəxslər üzrə daxilolmalar 14,2%, torpaq pay mülkiyyətçilərindən daxilolmalar isə 26,5% artıb.

Bu ilin yanvar-avqust aylarında büdcədən maliyyələşən təşkilatlar üzrə daxilolmalar 355 mln. manat təşkil edib. Həmin təşkilatların ödədiyi icbari dövlət sosial sığorta haqları əvvəlki ilin müvafiq dövrünə nisbətən 11,1% artıb.

Sair gəlirlər (sanatoriya-kurort yollayışlarının qismən dəyərinin ödənilməsi və s.) üzrə daxilolmalar 4,4 mln. manat təşkil edib.

Ümumilikdə DSMF üzrə icbari dövlət sosial sığorta haqlarının daxil olması proqnozu 100,3%% icra olunub.

Cari ilin yanvar-avqust aylarında DMSF-nin xərcləri 1 602,6 mln. manat olub. Hesabat dövründə pensiya və müavinətlərin maliyyələşdirilməsi üçün Fond tərəfindən 1 571,8 mln. manat vəsait yönəldilib ki, bu da əvvəlki ilin müvafiq dövrünə nisbətən 21,7% çoxdur. Pensiya xərcləri 2011-ci ilin müvafiq dövrünə nisbətən 22,2% artaraq 1 534,9 mln. manat təşkil edib. Yanvar-avqust aylarında əhaliyə 36,9 mln. manat məbləğində müavinət ödənilib.

Qeyd edək ki, 2012-ci ilin iyulun 1-nə əmək pensiyalarının orta aylıq məbləği 150,8 manat olub, o cümlədən yaşa görə əmək pensiyasının orta aylıq məbləği 167,2 manat təşkil edib.