Maliyyə

Ana səhifə

Maliyyə

Azərbaycanda sənaye istehsalı 3,3% azalıb

14 sentyabr 2012 14:01 (UTC +04:00)

Bakı. Vahab Rzayev - APA-Economics. Bu ilin yanvar-avqust ayları ərzində Azərbaycanda 23,0 mlrd. manatlıq sənaye məhsulu istehsal edilib ki, bu da ötən ilin müvafiq dövrü ilə müqayisədə 3,3% azdır.

Dövlət Statistika Komitəsindən «APA-ECONOMICS»ə verilən məlumata görə, məhsulun 76,5%-i mədənçıxarma bölməsində, 18,2%-i emal bölməsində, 4,8%-i elektrik enerjisi, qaz və buxar istehsalı, bölüşdürülməsi və təchizatı bölməsində, 0,5%-i su təchizatı, tullantıların təmizlənməsi və emalı bölməsində istehsal olunub.

Ötən ilin yanvar-avqust ayları ilə müqayisədə məhsul istehsalı mədənçıxarma bölməsində 5,5% azalıb, emal bölməsində 8,9%, elektrik enerjisi, qaz və buxar istehsalı, bölüşdürülməsi və təchizatı bölməsində 7,4%, su təchizatı, tullantıların təmizlənməsi və emalı bölməsində 2,7% artıb.

Sənayenin qeyri-neft sektorunda məhsul istehsalı 7,9% artıb, neft sektorunda isə 5,4% azalıb.

Mədənçıxarma bölməsinin məhsullarından neft hasilatı 29,4 mln. ton, əmtəəlik qaz hasilatı 11,4 mlrd. kubmetr təşkil edib.

Emal sektorunda qida məhsulları istehsalı 3,3%, içki istehsalı 11,5%, toxuculuq sənayesi məhsulları istehsalı 2,2 dəfə, geyim istehsalı 32%, poliqrafiya fəaliyyəti 1,9 dəfə, rezin və plastik məmulatlar istehsalı 3 dəfə, tikinti materialları istehsalı 22,7%, metallurgiya sənayesi məhsulları istehsalı 13,8%, hazır metal məmulatları istehsalı 1,8 dəfə, elektrik avadanlıqları istehsalı 2,4 dəfə, sair nəqliyyat vasitələri istehsalı 19,4%, mebel istehsalı 3,2 dəfə, maşın və avadanlıqların quraşdırılması və təmiri 16,2% artıb.

İlin 8 ayında 14 mlrd. kV/saat, yaxud 10,2% çox elektrik enerjisi istehsal olunub.