Maliyyə

Ana səhifə

Maliyyə

«YapıKredi» bank Azərbaycanda «Worldcard» kredit kartının təqdimatını keçirib - FOTOSESSİYA

«YapıKredi» bank Azərbaycanda «Worldcard» kredit kartının təqdimatını keçirib - <font color=red>FOTOSESSİYA</font>

18 sentyabr 2012 10:37 (UTC +04:00)

«APA-Economics»in məlumatına görə, təqdimatda «YapıKredi»nin baş direktoru Faik Açıkalın, icraçı direktor və baş direktorun müavini Karlo Vivaldi, baş direktorun pərakəndə bankçılıq üzrə müavini xanım Nazan Somer və «YapıKredi Bank Azərbaycan»ın İdarə Heyətinin sədri Coşkun Bulak iştirak ediblər.
F.Açıkalının sözlərinə görə, Azərbaycan bank üçün strateji əhəmiyyətə malikdir: «YapıKredi» olaraq Azərbaycana 1998-ci ildən 100% türk sərmayəsi ilə işləyən bank olaraq gəldik. Avqustun sonunadək aktivlərimizin həcmi 288,3 mln. dollara çatıb. Bu uğurumuz bizə ən qiymətli məhsullarımızdan olan «Worldcard»ı Azərbaycana gətirməkdə də təkan verən bir səbəb olub».
Türkiyənin ilk kredit kartını 23 il əvvəl istifadəyə buraxdıqlarını və bir çox yenilik həyata keçirərək bölmənin inkişafında liderlik etdiklərini ifadə edən F.Açıkalın bildirib ki, indi «Worldcard» Azərbaycan iqtisadiyyatına da yeni bir hərəkət və dinamiklik qatacaq. «Türkiyədə olduğu kimi, «Worldcard» Azərbaycanda da bölməyə liderlik edəcək. Həm də bu cəhdimiz yalnız bir ticarət əməliyyatı deyil. «Worldcard»la Azərbaycandakı ödəniş sistemlərinin inkişaf etdirilməsində də rol oynayacağıq. Bu bazarda infrastrukturun formalaşdırılması üçün lazım olan əlavə dəyərləri yaradacaq, bütün tədris işlərini təmin edəcəyik. Bu işdə 2011-ci ildə bir hissəsi Azərbaycanda qurulmuş «YapıKredi» Bank Akademiyamızdan faydalanacağıq. «Worldcard»ın Azərbaycan xalqına, iqtisadiyyatına və bank bölməsinə xeyir gətirməsini diləyirəm», - deyə F.Açıkalın bildirib.
«Worldcard»ın Azərbaycandakı hədəf və planlarını izah edən xanım N.Somer Azərbaycanda iyulun sonunadək 279 min ədəd kredit kartının olduğunu, plastik kartlarla aparılan əməliyyatların illik həcminin isə iyulun sonuna 811 mln. manat səviyyəsində olduğunu söyləyib. Azərbaycan əhalisinin böyük hissəsinin ticarət obyektləri də daxil olmaqla nağd ödənişlərə üstünlük verdiyini, buna paralel olaraq kredit kartı qəbul məntəqələrinin də məhdud sayda olduğunu qeyd edən N.Somer bildirib ki, əvvəlcə istehlakçıları, eyni zamanda pərakəndə bölməsini sistemin faydaları ilə bağlı məlumatlandırmaq hədəf seçilib. Ümumilikdə isə bankın hədəfi 2013-cü ilin sonuna qədər «Worldcard»ların sayını 150 mindən artıq, əməliyyatların həcmini 228 mln. dollar, sonrakı ildə isə 534 mln. dollara çatdırmaqdır.
«YapıKredi Bank Azərbaycan»ın İdarə Heyətinin sədri C.Bulak isə bankın 12 filial və 380-dən çox işçi ilə, həm təşkilati, həm də fərdi bankçılıq sahəsində fəaliyyətini güclü bir şəkildə davam etdirdiyini və ilin sonunadək filialların sayının 14-ə çatdırılacağını bildirib. «İki mindən çox təşkilati, 48 min fərdi müştəriyə xidmət göstərən «YapıKredi Bank Azərbaycan» «Worldcard» ilə Azərbaycanda ödəniş sistemlərinin inkişaf etdirilməsi üçün lazımi bazanı formalaşdıracaq», - deyə C.Bulak dildirib.

Qeyd edək ki, «Worldcard» kredit kartları hissə-hissə ödəniş, bal qazanma kimi xüsusiyyətləri ilə bərabər nağd avans çəkilməsi, virtual kart, əlavə kart və əlavə xidmətlər də təqdim edəcək. Qarşıdakı ildə kartlar qarşılıqlı olaraq hər iki ölkədə etibarlı olacaq. İlk mərhələdə fərdlərə istiqamətli «Worldcard» və şirkətlər üçün «World Business Kart» ilə bazara daxil olan «YapıKredi», «PulKart» markası ilə bank kartı (debet kartı) da təqdim edəcək. Həmçinin bildirilib ki, «Worldcard» kredit kartında olacaq kredit limiti müştərinin əmək haqqının bir mislinə bərabər həcmdə nəzərdə tutulub. «Worldcard» Bakıda 50 markaya aid 200-ə yaxın üzv ticarət obyektində xüsusi imkanlarla alış-veriş fürsətləri təqdim edir, gələcəkdə həm markaların, həm ticarət obyektlərinin artırılacağı gözlənilir.