Maliyyə

Ana səhifə

Maliyyə

Azərbaycan parlamenti bir sıra yeni iqtisadi qanunların qəbuluna hazırlaşır

18 sentyabr 2012 13:48 (UTC +04:00)

Bu barədə APA-ya açıqlamasında parlamentin İqtisadi siyasət Komitəsinin sədri Ziyad Səmədzadə məlumat verib.

Z.Səmədzadənin sözlərinə görə, gündəlikdə 2013-cü ilin dövlət büdcəsi və büdcə zərfinə daxil olan bir sıra sənədlərlə yanaşı Vergilər Məcəlləsinə dəyişikliklərin müzakirəsi əksini tapıb.

«Biz bu sessiya çərçivəsində nəhayət ki Rəqabət Məcəlləsinin müzakirəsinə başlamaq və bu sənədi qəbul etmək niyyətindəyik. Bu, çox vacib sənəddir», - deyə Komitə sədri vurğulayıb.

Z.Səmədzadə qeyd edib ki, digər vacib sənədlər arasında «Qiymətləndirmə haqqında» qanun layihəsi yer alır. Azərbaycanda belə bir qanun olsa da, müasir tələblərə cavab vermədiyini deyən Z.Səmədzadənin sözlərinə görə, müzakirəyə çıxarılacaq qanun layihəsi yenidən hazırlanıb.

Müzakirəyə çıxarılacaq başqa bir sənəd isə «Təhsil krediti haqqında» qanun layihəsidir. Komitənin üzvləri Əli Məsimli və Vahid Əhmədov tərəfindən hazırlanmış sözügedən qanun layihəsi ilə bağlı dövlət və hökumət rəhbərliyinin mövqeyinin nədən ibarət olduğunu açıqlamayan Z.Səmədzadə hesab edir ki, bu tip qanunlar dünyanın əksər ölkələrində mövcuddur: «Ümid edirəm ki, bu həm də ali təhsil müəssisələrinin inkişafına, təhsilin keyfiyyətinin yaxşılaşmasına təsir göstərəcək».

Parlamentin payız sessiyasında «İpoteka haqqında» qanuna dəyişiklər ediləcəyi barədə yayılan məlumatlara gəlincə, Z.Səmədzadə rəhbərlik etdiyi Komitəyə bununla bağlı hər hansı bir sənədin daxil olmadığını bildirib.