Maliyyə

Ana səhifə

Maliyyə

«Unibank» müştərilərə valyuta bazarında yeni xidmətlər təklif edir

27 sentyabr 2012 12:55 (UTC +04:00)

Bakı. Vahab Rzayev – APA-Economics. «Unibank» ASC bu gündən etibarən FOREX bazarına onun vasitəçiliyi ilə qoşulan müştərilərə istənilən və onlara rahat olan «kredit çiyni» təqdim etməyə hazırdır. Bankdan «APA-Economics»ə verilən məlumata görə, bundan başqa, bankın oktyabr ayından start verəcəyi aksiyasına görə, «Uniforex» hesabında hər 500 ABŞ dolları həcmində vəsait artıran treyderlərə bank tərəfindən 10% bonus təqdim edilir.

Bonus kimi hesaba yatırılan vəsaitlər real ticarətdə tam sərbəst istifadə oluna bilər. Müştərilərə 100-dən artıq valyuta cütlüyü üzrə həm real, həm demo-ticarət aparmağa imkan verən «Uniforex» xidməti, bir neçə maliyyə bazarlarında əməliyyatların vahid hesabdan və əlverişli qiymətlər üzrə aparılmasını nəzərdə tutur. Bütün əməliyyatlar çoxfunksional «Unibank Trading Station» proqram platforması vasitəsi ilə keçirilir. Xidmətə qoşulmaq üçün «Unibank» filiallarından birində minimal məbləği 300 dollardan az olmayan cari depozit hesabı açdırmaq və xüsusi www.uniforex.az saytından «Unibank Trading Station» platformasını yükləmək kifayətdir. Bu təqdirdə hər bir müştəri FOREX bazarında ilkin mədaxil məbləğindən qat-qat çox həcmlərdə istədiyi valyutalar ilə əməliyyatlar apara bilər. Bu zaman «Uniforex» hesabları üzrə vəsaitlərin artırılması və çıxarılması gecə-gündüz və ən əsası banka hər-hansı bir komissiyalarının ödənilməsi aparılmadan keçirilir.

Qeyd edək ki, «Unibank» valyuta treyderi peşəsini öyrənmək və maliyyə bazarlarının incəlikləri barədə biliklərini artırmaq istəyənlər üçün treninqlər təşkil edir. Belə ki, sentyabrın 20-21-də Bank ticarətə yeni başlayan və peşəkar treyderlərə İsveçrənin «MIG Bank»ın analitiklərinin köməyi ilə təlim seminarı keçirib. Təlimləri aparan xarici ekspertlər arasında «MIG Bank»ın Rusiya və MDB-dən olan müştərilərlə iş üzrə müdiri xanım Kseniya Zubkova, habelə bazar strategiyaları üzrə təhlilçilər Bidjoy Kar və Aleksandr Kazak olublar. Treninqlərin nəticələrinə görə, hər bir iştirakçıya «Unibank» və «MIG Bank» adından müvafiq sertifikatlar təqdim edilib.

Xatırladaq ki, broker xidmətlərinin göstərilməsi üzrə ixtisaslaşan «MIG Bank», FOREX bazarında «Unibank»ın tərəfdaşıdır.