Maliyyə

Maliyyə

Bakıda keçirilən beynəlxalq mikromaliyyə konfransı başa çatıb

05 oktyabr 2012 13:18 (UTC +04:00)

Bakı. Elnur Hüseynquluyev – APA-Economics. Bakıda Azərbaycan Mikromaliyyə Assosiasiyasının (AMA) təşkilatçılığı ilə oktyabrın 4-5-də «Düşünmək zamanıdır. Risklərin İdarə edilməsi» mövzusunda keçirilən VI Mikromaliyyə Konfransı başa çatıb.

«APA-Economics»in məlumatına görə, tədbirin ikinci günündə «Qadınların mikromaliyyədə xüsusi rolu: Biz mikromaliyyəni qadınlar üçün hansı şəkildə səmərəli edə bilərik?», «Maliyyə savadlılığı-tələblər və imkanlar» və «Orta menecmentdə bacarıqların inkişafı» mövzularda təqdimatlar keçirilib.

«ECLOF Internatinonal» şirkəti İdarə Heyətinin üzvü xanım Nina Nayar «Qadınların mikromaliyyədə xüsusi rolu: Biz mikromaliyyəni qadınlar üçün hansı şəkildə səmərəli edə bilərik?» mövzusunda geniş təqdimatla çıxış edib. N.Nayar bildirib ki, mikromaliyyə institutları idealist və praqmatik sahələrə görə qadın müştəriləri cəlb etməyə meyl göstərir: «Bu təşkilatların prinsiplərinə əsasən, qadınların yoxsulluğunun aradan qaldırılması açıq hədəfdir, çünki onlar peşəkar olmayan qaydada yoxsuldurlar. Digər tərəfdən isə qadınlar qrup şəklində mikromaliyyədə daha yaxşı ödəmə dərəcələrinə sahibdir və buna görə də bir çox mikromaliyyə təşkilatları kredit verməkdə onlara daha çox etibar edir».

Təqdimat zamanı N.Nayar qadın müştəriləri necə cəlb edib və qoruyub saxlaya bilməyin yollarını axtarmaq barədə danışıb. Ekspert daha sonra Azərbaycanda xanımların hansı sahəyə maraq göstərməsindən danışıb. O bildirib ki, Azərbaycanda xanımların daha çox çalışdığı sahə maliyyə sahəsi, xüsusən də bank sektorudur: «Azərbaycan bank sektorunda çalışan işçilərin təxminən 50%-ni qadınlar təşkil edir».

«EFSE/Finance-in-Motion» şirkəti Texniki yardım Departamentinin direktoru xanım Marietta Feddersen isə «Maliyyə savadlılığı: tələblər və imkanlar» mövzusunda təqdimatında borcluların maliyyə savadlılığı səviyyəsinin çatışmazlığı nəticəsində yaranan problemlər barədə danışıb.

M.Feddersenin sözlərinə görə, son illərdə maliyyə xidmətlərinin mürəkkəbliyinin artması nəticəsində orta istehlakçı bu fərqlilik və müxtəlifliyi anlamaqda çətinlik çəkir: «Əsas maliyyə bazarından məhrum olan insanlara maliyyə xidmətlərinə çıxış imkanları yaradan mikromaliyyə, belə bir bazarın müştərilərinin qavrama səviyyəsi məsələsi ilə yaxından maraqlanır».

Tədbirin sonunda yerli və xarici ekspertlər tərəfindən «Orta menecmentdə bacarıqların inkişafı» və «Mikromaliyyə riskli biznesdir» mövzusunda müzakirələr aparılıb.

Qeyd edək ki, tədbirdə adekvat daxili nəzarət sistemləri, mikromaliyyədə müştəri mühafizəsi, risk-menecment, çətin çatılan ərazilərdə ən yeni faydalı texnologiyalar, mikromaliyyədə qadınların rolu, maliyyə təhsili, mikro kredit və mikro sahibkarlıq müəssisələri üçün hüquqi çərçivənin təkmilləşdirilməsi, orta menecmentdə bacarıqların artırılması və sosial fəaliyyətin idarə olunması kimi mövzuları əhatə edib.

Xatırladaq ki, tədbirdə yerli mikromaliyyə təşkilatları ilə yanaşı xarici investiorlar – «Triple Jump», «Finance in Motion», «PlaNİS responsAbility», EBRD, KfW və IFC təşkilatları iştirak edib.