Maliyyə

Maliyyə

Səlim Müslümov: «Azərbaycanın sığorta-pensiya sistemində aparılan islahatlar konkret hesablamalara əsaslanır»

15 oktyabr 2012 11:01 (UTC +04:00)

Bakı. Vahab Rzayev – APA-Economics. Azərbaycanda sığorta-pensiya sisteminin inkişafı beynəlxalq standartlar üzrə həyata keçirilən aktuar hesablamalara əsaslanaraq aparılır ki, bütün baş verən dəyişikliklər hesablamalara əsaslanır. «APA-Economics»in məlumatına görə, bunu YAP-ın veb-saytına müsahibəsində Dövlət Sosial Müdafiə Fondunun sədri Səlim Müslümov bildirib.

S.Müslümovun sözlərinə görə, perspektiv dövrdə pensiyaların baza hissəsinin ölkə üzrə yaşayış minimumu səviyyəsinə uyğunlaşdırılması, orta aylıq pensiya məbləğinin orta aylıq əmək haqqına nisbətinin artırılması istiqamətində tədbirlərin həyata keçirilməsi, pensiya təminatına yönəldilən vəsaitlərin ÜDM-ə nisbəti üzrə beynəlxalq təcrübədə qəbul olunan normaların gözlənilməsi əsas vəzifələrdəndir. Bunun üçün isə sığorta-pensiya sisteminin maliyyə dayanıqlığının təmin olunması əsas şərtdir.

S.Müslümov vurğulayıb ki, bazar iqtisadiyyatı şəraitində sosial ödənişlərə yönəldilən vəsaitlər öz mənbəyini real iqtisadiyyatdan, əmək haqlarının sosial sığortaya cəlb olunmasından götürməlidir. Bu məqsədlə həm iqtisadiyyatdakı əmək haqqı məbləğlərinin tam uçota alınması, həm də sosial sığortalanmadan yayınmanın aradan qaldırılması vacib şərtdir. Məsələyə makroiqtisadi səviyyədə yanaşdıqda, bu, iqtisadiyyatdan sosial sığorta haqları şəklində toplanan vəsaitlərin yenidən pensiya ödənişləri kimi geri qaytarılması, yəni əlavə mənfi fiskal təsirlər yaratmadan maliyyələşmələrin aparılması kimi özünü göstərir. Fərdi pensiyaçı səviyyəsində yanaşdıqda isə, bu, hər bir şəxsin pensiya şəklində alacağı vəsaitlərin ödənilən sosial sığorta haqları ilə əlaqələndirilməsidir ki, həmin mexanizm sığorta olunanların fərdi uçotu sisteminin təşkilində ifadə olunur. Ona görə də, əsas hədəf işləyənlərin iş yerlərində rəsmiləşdirilməsinə və əmək haqqının tam leqallaşmasına nail olmaq, bu yolla sosial sığorta haqları kimi ödənən və fərdi hesablarda qeydə alının pensiya kapitallarını artırmaqdır.

Fondun sədri bildirib ki, DSMF-nin maliyyə dayanıqlığının artırılmasına yönəldilmiş istiqamətlərdən biri də sığorta-pensiya sistemində yığım komponentinin tətbiqidir. Belə ki, müəyyən stimullaşdırıcı vasitələr daxil edilməklə yığım komponenti vasitəsilə məşğul əhalinin sığorta-pensiya sistemində daha aktiv iştiraka cəlb olunmasıdır. Hazırda yığım komponentinin tətbiqi məqsədilə beynəlxalq təcrübənin öyrənilməsi və müvafiq təhlillərin aparılması işi davam etdirilir. Yığım komponentinin tətbiqi daha mürəkkəb mərhələ olmaqla, ölkədə investisiya mühitindən, maliyyə və qiymətli kağızlar bazarının inkişafından və sığorta-pensiya sistemindən kənar digər amillərdən daha çox asılıdır.

S.Müslümovun sözlərinə görə, daha bir istiqamət qeyri-dövlət pensiya fondlarının yaradılması ilə bağlıdır. O bəyan edib ki, Azərbaycanda sığorta-pensiya sisteminin inkişafına dair Dövlət Proqramı (2009-2015-ci illər) ilə müəyyən olunmuş tədbirlər planına uyğun olaraq qarşıdakı illər ərzində Azərbaycanda qeyri-dövlət pensiya fondlarının yaradılması üçün qanunvericilik bazasının formalaşdırılması istiqamətində əsas addımların atılacağı nəzərdə tutulur.