Bu ilin iyun ayının sonuna Azərbaycanda fəaliyyətdə olan bankların cəmi aktivləri 50,328.1 mln. manat, cəmi öhdəlikləri 44,086.3 mln. manat, balans kapitalı 6,241.8 mln. manat olub
"APA-Economics" bu barədə Azərbaycan Mərkəzi Bankına istinadən xəbər verir.
İyun ayında bank sektorunun cəmi aktivləri və cəmi öhdəlikləri müvafiq olaraq 2,4% və 3% artıb, balans kapitalı isə 1.4% azalıb. Balans kapitalının azalması dividend ödənişləri ilə bağlı olub.
Bu dövrdə bankların kredit portfeli 1,1% və ya 271.3 mln. manat artaraq 25,429.5 mln. manat olub. Kredit portfelinin strukturu: ı) biznes kreditləri – 54.6% (13,874.8 mln. manat); ıı) istehlak kreditləri – 30% (7,633.8 mln. manat) və ııı) ipoteka kreditləri – 15.4% (3,920.8 mln. manat).
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 0,6 faiz bəndi azalaraq 1.7% təşkil edib.
Bankların öhdəliklərinin strukturunda ənənəvi olaraq depozit portfeli üstünlük təşkil edir – cəmi öhdəliklərin 79.8%-i və ya 35,185 mln. manat. Depozit portfelinin 60.6%-i (21,304.8 mln. manat) hüquqi şəxslərin, 39.4%-i (13,880.3 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir
Fiziki şəxslərin əmanətləri (müddətli + cari hesablar) iyun ayında 3.6% və ya 480.7 mln. manat artmışdır. Artımın 86.5%-i (415.8 mln. manat) milli valyutada, 13.5%-i (65 mln. manat) xarici valyutada əmanətlər üzrə olub.
Fiziki şəxslərin əmanətlərinin 65.6%-i (9,100.4 mln. manat) milli valyutada, 34.4%-i (4,779.8 mln. manat) xarici valyutadadır. Fiziki şəxslərin əmanət portfelinin 55.8%-i (7,750.6 mln. manat) müddətli əmanətlərdən ibarətdir. Hüquqi şəxslərin tələbli depozitləri 16,252.9 mln. manat olmaqla, hüquqi şəxslərin cəmi depozit portfelinin 76.3%-ni təşkil edib.
Fiziki şəxslərin əmanətlərinin dollarlaşması iyun ayında əvvəlki ilin müvafiq dövrünə nəzərən isə 2.6 faiz bəndi azalaraq 33.9% təşkil edib.
Altı ayda banklar tərəfindən 614 mln. manat xalis mənfəət, 875.5 mln. manat məbləğində əməliyyat mənfəəti generasiya edilib.
Cari ilin 6 ayında banklar tərəfindən ümumilikdə 124.1 mln. manat məbləğində mənfəət vergisi ödənilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
