Maliyyə

Ana səhifə

Maliyyə

Azərbaycanda sosial sığorta haqları üzrə daxilolmalar 17% artıb

14 aprel 2022 16:40 (UTC +04:00)

Bu ilin aprelin 1-nə qeyri-neft sektorunun qeyri-dövlət bölməsində bağlanan əmək müqavilələrinin sayı 779 476 təşkil edib ki, bu da əmək münasibətlərinin şəffaflaşdırılması istiqamətində islahatların başlandığı 2019-cu ilin əvvəli ilə müqayisədə 239 554 vahid çoxdur. Dövlət Vergi Xidmətindən “APA-Economics”ə verilən məlumata görə, məcburi dövlət sosial sığorta və işsizlikdən sığorta haqları üzrə daxilolmalarda müşahidə olunan əhəmiyyətli artım əmək bazarında şəffaflaşma proseslərinin göstəricisidir və gəlir vergisi üzrə güzəştin tətbiqinin fiskal səmərəsinə dəlalət edir.
2022-ci ilin yanvar-mart aylarında muzdlu işçi sayının və əməkhaqqı fondunun “ağarması” prosesi şəraitində məcburi dövlət sosial sığorta haqları üzrə daxilolmalar 1 047 408,3 min manat təşkil etməklə ötən ilin müvafiq dövrü ilə müqayisədə 17% və ya 152 118,3 min manat artıb, daxilolmalar üzrə proqnoz 86 602,1 min manat artıq icra edilib. Qeyri-büdcə təşkilatları üzrə daxilolmalar ötən ilin eyni dövrü ilə müqayisədə 19% artaraq 649 803,9 min manat təşkil edib, proqnoz 118,2% icra olunub.
İşsizlikdən sığorta haqları üzrə daxilolmalar ötən ilin eyni dövrü ilə müqayisədə 16,4% artaraq 35,3 mln. manat olub, proqnoz 112.3% icra edilib. Qeyri-büdcə təşkilatları üzrə daxilolmalar 18,1% artaraq 25,7 mln. manat təşkil edib, daxilolmalar üzrə proqnoz 122,5% icra olunub.