Maliyyə

Ana səhifə

Maliyyə

Hesablama Palatasının sədri: İlk dəfədir ki, icmal büdcənin 6 komponentindən 5-i üzrə büdcədə profisit müşahidə edilib

12 iyun 2026 12:32 (UTC +04:00)

Müstəqillik tarixində ilk dəfədir ki, icmal büdcənin 6 komponentindən 5-i üzrə büdcədə profisit müşahidə edilib.
APA xəbər verir ki, bunu Hesablama Palatasının sədri Vüqar Gülməmmədov Milli Məclisin bu gün keçirilən iclasında “Azərbaycan Respublikasının 2025-ci il dövlət büdcəsinin icrası haqqında” Azərbaycan Respublikasının Qanun layihəsinə və “Azərbaycan Respublikasının 2025-ci il dövlət büdcəsinin icrasına dair illik hesabat”a Azərbaycan Respublikası Hesablama Palatasının Rəyi”ni təqdim edərkən bildirib.
Vüqar Gülməmmədov deyib ki, dövlət vəsaitinin daha rasional istifadə edilməsini təşkilatların ən ümdə vəzifəsinə çevirmək əsas hədəf hesab edilməlidir. Bu iş ötən ilin dövlət büdcəsinin icrasının və ümumiyyətlə, dövlətin maliyyə idarəetməsinin intizam fəlsəfəsi üzərində qurulmasına xidmət edir: “2025-ci ildə dövlət büdcəsinin gəlirləri müstəqilliyimizdən bəri ən yüksək həddinə çataraq 39,2 mlrd. manat təşkil edib. Gəlirlərin həcminin əhəmiyyətli artımı fonunda eynilə xərclər üzrə müşahidə edilən tarixi artım nəticəsində mütləq rəqəm 38,6 mlrd. manat olub. Lakin xərclər üzrə son 10 ildə ən aşağı icra faizi məhz ötən il 93,2% nisbətində müşahidə edilib, proqnozla müqayisədə büdcə xərcləri 2803,0 mln.manat az icra edilib. Bu da digər fiskal intizam parametri olan büdcə balansına təsir edib. Nəticədə dövlət büdcəsində 3 mlrd. manatlıq proqnozlaşdırılan kəsir 580 mln. manatlıq profisitlə əvəz edilib”.
Hesablama Palatasının sədri nəzərə çatdırıb ki, icmal büdcədə də 2025-ci ildə profisit müşahidə edilib: “Bu göstərici müvafiq olaraq 3355,1 mln.manat və ya ÜDM-in 2,6% nisbətində olub. Profisitin yaranmasının mənbəyi dövlət büdcəsi ilə yanaşı Dövlət Neft Fondu, Dövlət Sosial Müdafiə Fondu, İşsizlikdən Sığorta Fondu, Naxçıvan Muxtar Respublikasının büdcəsində yaranan büdcə artıqlığıdır. Beləliklə, müstəqillik tarixində ilk dəfədir ki, icmal büdcənin 6 komponentindən 5-i üzrə büdcədə profisit müşahidə edilib”.
Hesablama Palatasının sədri nəzərə çatdıırb ki, hesabat ilində icra edilmiş dövlət büdcəsi xərclərinin 6,6%-i büdcədən ayırmalar və transfertlərlə bağlı olub: “Büdcədən transfertlər 2024-cü illə müqayisədə 8,9% azdır. Bu vəsaitlərin aylar üzrə təhlili proqnoz və icra göstəriciləri arasında əhəmiyyətli fərqlərin olduğunu göstərir. Dövlət büdcəsindən transfertlərin əksinə olaraq, dövlət büdcəsinə transfertlər üzrə aylıq göstəricilərin proqnoz və icra göstəricilərində demək olar ki, kənarlaşma izlənməyib. Hesablama Palatası olaraq büdcə zərfində dövlət proqramları və digər strateji sənədlərin nəticəliliyi, o cümlədən maliyyə və qeyri-maliyyə göstəricilərinin geniş öz əksini tapmasını məqsədəuyğun hesab edirik”.