Bakı. Yeganə Laçınzadə - APA-Economics. Azərbaycanda fəaliyyət göstərən kredit təşkilatlarında yerləşdirilmiş depozitlərin həcmi 2015-ci il oktyabrın 1-nə 17 477,5 mln. manat təşkil edib.
Azərbaycan Mərkəzi Bankından (AMB) “APA-Economics”ə verilən məlumata görə, bu göstərici ötən ilin müvafiq dövrü ilə müqayisədə 2,946 mlrd. manat və ya 20,27% çoxdur. O cümlədən, avqust ayı ilə müqayisədə cari ilin sentyabr ayında depozitlərin həcmi 180,6 mln. manat və ya 1,02% azalıb.
Depozitlərin tərkibində 7 311,8 mln. manatı və ya 41,84%-i ev təsərrüfatları əmanətlərinin payına düşür. Əmanətlərin həcmi 2014-cü ilin oktyabrın 1-ə nisbətən 352,1 mln. manat və ya 5,06% artıb.
Eyni zamanda hüquqi şəxslərin depozitlərinin həcmi bu ilin oktyabrın 1-ə 10 165,7 mln. manata bərabərdir. Bu göstərici illik müqayisədə 2 593,9 mln. manat və ya 34,26% artıb.
Hüquqi şəxslərin depozitlərinin tərkibində 5 103,6 mln. manatı və ya 50,2%-i maliyyə təşkilatların depozitlərinin, 5 062,1 mln. manatı və ya 49,8%-i qeyri-maliyyə təşkilatların depozitlərinin payına düşür.
Yerli banklarda depozitlərin 4 297,9 milyonu manatla, 13 179,5 milyonu isə xarici valyutada yerləşdirilib.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
