Maliyyə

Ana səhifə

Maliyyə

Azərbaycan fond bazarında son vəziyyətlə bağlı yeni rüblük hesabat açıqlanıb

26 aprel 2013 08:19 (UTC +04:00)

Bakı. Nicat Mustafayev – APA-Economics. Bu ilin yanvar-mart ayları ərzində Azərbaycanda qiymətli kağızlar bazarının həcmi 1,7 mlrd. manat təşkil edib ki, bu da ÜDM-in 12,9%-ni, qeyri-neft ÜDM-in isə 25,2%-ni təşkil edib. «APA-Economics»in məlumatına görə, bu barədə Qiymətli Kağızlar üzrə Dövlət Komitəsinin 2013-cü ilin I rübü üzrə Fəaliyyət Hesabatında bildirilir.

Hesabatda qeyd olunub ki, iqtisadiyyatın qeyri-neft sektorunun maliyyələşməsinə xidmət edən korporativ qiymətli kağızlar bazarı I rüb ərzində yüksək templi artım nümayiş etdirib. Belə ki, dövr ərzində bazarın korporativ qiymətli kağızlar sektoru korporativ səhm və istiqrazların ilkin və təkrar bazarlarında canlanma tendensiyaları nəticəsində 65% artaraq 146 mln. manat təşkil edib.

«Hesabat dövründə ənənəvi olaraq səhmlərin ilkin bazarının ən aktiv iştirakçıları olan kommersiya banklarına qarşı kapital tələblərinin sərtləşdirilməsi şəraitində bankların səhm bazarından maliyyələşməsi artıb. Belə ki, dövr ərzində səhm bazarının bütövlükdə həcmi 2,2 dəfə artaraq 92 mln. manat təşkil edib. Səhm bazarının yüksək artım tempi bazarın ilkin və təkrar seqmentlərində də bərabər şəkildə əks olunub. Belə ki, səhm bazarının ilkin bazarı hesabat dövrü ərzində 2,7 dəfə, təkrar bazarı isə 1,9 dəfə artıb», - deyə hesabatda qeyd olunub.

Hesabat dövründə özəl sektor təmsilçilərinin istiqraz vasitəsilə maliyyələşmə meyllərində də artım müşahidə olunub. Belə ki, özəl şirkətlər tərəfindən yerləşdirilən istiqrazların məbləği 9% artaraq 18,5 mln. manat təşkil edib. Rüb ərzində korporativ istiqrazlar bazarında əqdlərin sayı 50% artıb, bazarın həcmi isə 17% artaraq 54 mln. manat təşkil edib.

Korporativ qiymətli kağızlar
Qiymətli kağızların növləri	2013-cü il Yanvar-Mart		2012-ci il Yanvar-Mart		Məbləğ üzrə fərq,%
Qiymətli kağızların növləri	Əqdlərin sayı	Məbləğ (manat)	Əqdlərin sayı	Məbləğ (manat)	Məbləğ üzrə fərq,%
KORPORATİV QİYMƏTLİ KAĞIZLAR	1 001	146 269 659	1 040	88 437 409	65%
Səhmlər	953	92 210 567	1 008	42 053 978	2,2 dəfə
Səhm (ilkin bazar)	45	45 020 621	18	16 565 800	2,7 dəfə
Səhm (təkrar bazar)	908	47 189 947	990	25 488 178	85%
Korporativ istiqrazlar	48	54 059 092	32	46 383 431	17%
Korporativ istiqrazlar - manat (ilkin bazar)	24	29 525 001	18	22 070 335	34%
Korporativ istiqrazlar - manat (təkrar bazar)	24	24 534 091	14	24 313 096	1%