Bakı. Yeganə Laçınzadə APA-Economics. 2015-ci ilin yanvar-oktyabr aylarında Azərbaycanda toplanmış sığorta haqlarının 62,3%-i və ya 236,1 mln. manatı könüllü sığorta növlərinin payına düşüb.
“APA-Economics”in xəbərinə görə, bunu bu gün keçirilən ənənəvi brifinq zamanı Azərbaycan Sığortaçılar Assosiasiyasının (ASA) sədri Orxan Bayramov deyib.
Onun sözlərinə görə, bu göstərici ötən ilin eyni dövrü ilə müqayisədə 2,9% çoxdur.
İcbarı sığorta növlərində yığım isə 142,8 mln. manat və ya bazarın 37,7%-ni təşkil edib. Ötən ilin eyni dövrünə nisbətən icbari sığorta bazarı 12,9% böyüyüb.
10 ayda ümumi ödənişin 74,1%-i və ya 103,8 mln. manatı könüllü sığorta növlərinin payına düşüb. Könüllü sığorta üzrə ödəniş ötən ilin eyni dövrünə nisbətən 7,3% artıb.
İcbari sığorta növləri üzrə ödəniş isə 36,2 mln. manat və ya ümumi bazarın 25,9%-ni təşkil edib. Bu, ötən ilin eyni dövrünə nisbətən 4,6% çoxdur.
Hesabat dövründə könüllü sığortadan toplanmış hər 100 manat sığorta haqqı müqabilində 44 manat ödəniş həyata keçirilib. 2014-cü ilin eyni dövründə bu rəqəm 42,2 manat olub. İcbarı sığortadan toplanmış hər 100 manat üzrə ödəniş isə 27,4 manatdan 25,4 manata düşüb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
