Maliyyə

Maliyyə

Azərbaycanın iqtisadi inkişaf naziri BVF-nin missiyasını qəbul edib

13 noyabr 2012 15:10 (UTC +04:00)

Bakı. Nicat Mustafayev – APA-Economics. Azərbaycanın iqtisadi inkişaf naziri Şahin Mustafayev Beynəlxalq Valyuta Fondunun (BVF) Bakıda səfərdə olan missiyası ilə görüşüb.

İqtisadi İnkişaf Nazirliyindən «APA-Economics»ə verilən məlumata görə, görüşdə Ş.Mustafayev Azərbaycan iqtisadiyyatı və qazanılmış nailiyyətlər barədə məlumat verərək, ölkədə siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını vurğulayıb. Bu ilin ilk 9 ayının iqtisadi göstəriciləri barədə məlumat verən nazir iqtisadiyyatın bütün sahələrində, xüsusilə qeyri-neft sektorunda artım dinamikasını qeyd edib, ilin sonuna proqnozları diqqətə çatdırıb.

Ş.Mustafayev ölkədə aparılan sənayeləşmə siyasəti, eləcə də kənd təsərrüfatı, İKT, nəqliyyat, turizm, alternativ enerji və s. sahələrdə həyata keçirilən layihələr barədə məlumat verib, iqtisadi inkişafda özəl bölmənin rolunun daha da artdığını vurğulayıb.

Öz növbəsində BVF-nin Azərbaycan nümayəndəliyinin rəhbəri Raca Almarzoqi Azərbaycanda iqtisadi sabitliyin qorunub saxlanılması və dinamik iqtisadi inkişafın təmin olunması üçün həyata keçirilən tədbirlərin BVF tərəfindən maraqla izləndiyini qeyd edib, islahatların bundan sonra da davam etdirilməsinin əhəmiyyətini vurğulayıb.

Görüşdə 2013-cü il üçün proqnozlar, qeyri-neft sektorunun ÜDM-də payının daha da artırılması və s. məsələlərlə bağlı fikir mübadiləsi aparılıb.