Bakı. Musa Əhmədov - APA-Economics. 2015-ci ildə Azərbaycanda iqtisadi artımın 4,4% təşkil edəcəyi proqnozlaşdırılır.
“APA-Economics”in məlumatına görə, bu barədə Azərbaycan Mərkəzi Bankının 2015-ci il üçün pul və maliyyə sabitliyi siyasətinin əsas istiqamətləri barədə yaydığı bəyanatda deyilir.
Mərkəzi Bank ölkədə qeyri-neft sektoru üzrə 8,2%-lik artım proqnozlaşdırır. “İqtisadi artımda daxili tələbin rolu əhəmiyyətli səviyyədə qalacaq. Proqnozlara görə, 2015-ci ildə daxili investisiyalar 6,1%, əhalinin pul xərcləri isə real olaraq 5,2% artacaq”, - deyə bəyanatda vurğulanır.
Bəyanatda qeyd olunub ki, 2015-ci ildə Azərbaycan iqtisadiyyatında artım davam edəcək, dövlətin strateji inkişaf proqramlarının həyata keçirilməsi iqtisadi artıma təsir edən mühüm amillərdən biri olacaq. İqtisadiyyatın şaxələnməsində qeyri-neft sektorunda investisiya fəallığı və ixrac potensialının reallaşdırılması mühüm rol oynayacaq. 2015-ci ildə ölkənin xarici iqtisadi mövqeyi əlverişli qalacaq. Ölkə iqtisadiyyatının makroiqtisadi sabitliyi təmin edən yüksək maliyyə dayanıqlığı qorunacaq. Mövcud makroiqtisadi proqnozlar çərçivəsində tədiyyə balansının cari əməliyyatlar hesabının profisitli olması gözlənilir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
