MDB

Ana səhifə

MDB

Boris Klimçuk: “İlin sonuna kimi Azərbaycanla Ukrayna arasında ticarət dövriyyəsinin həcmi 1 milyard dollara çata bilər”

04 sentyabr 2008 10:42 (UTC +04:00)

Bakı. Laçın Sultanova-APA. 2008-ci ilin ilk yarısına kimi Ukrayna və Azərbaycan arasında ticarət dövriyyəsinin həcmi 485,2 milyon dollar təşkil edib. APA-nın məlumatına görə, bu rəqəmləri bu gün keçirdiyi mətbuat konfransında Ukraynanın Azərbaycandakı səfiri Boris Klimçuk açıqlayıb. Onun sözlərinə görə,
ötən ilin müvafiq dövrində bu rəqəm 279 milyon, 2007-ci il ərzində 494,4 milyon, 2006-da 355 milyon, 2005-də 259 milyon dollar olub. İki ölkə prezidentinin müvafiq dövlət qurumları qarşısında bu göstəricinin 1 milyard dollara çatdırılması vəzifəsi qoyduğunu deyən diplomat hesab edir ki, əlaqələr belə inkişaf etsə, bu ilin sonuna kimi deyilən məqsədə nail olmaq olar. B. Klimçuk Azərbaycandan Ukraynaya ixracın artdığını xüsusi qeyd edib və bunu Azərbaycan iqtisadiyyatının dinamik inkişafı ilə əlaqələndirib.

O bildirib ki, Ukrayna iş adamları Azərbaycana böyük maraq göstərir, yaxın günlərdə bir qrup biznesmen Azərbaycana səfər edəcək, Bakı və Gəncədə olacaqlar. Nümayəndə heyətinin tərkibinə neft və gündəlik tələbat malları sektorunda çalışan iş adamları daxildir. Səfir nümayəndə heyətinin “Azərsun Holdinq” şirkəti ilə şəkər istehsalına dair danışıqlar aparacağını söyləyib.

Odesa-Brodı-Plotsk-Qdansk neft kəmərinin texniki doldurulması ilə bağlı sualı cavablandıran diplomat bildirib ki, Azərbaycan bu məsələ ilə bağlı bütün öhdəlikləri yerinə yetirib, Ukrayna bu məsələni sentyabrın əvvəlinə kimi bitirməli olsa da, işi başa çatdırmayıb. Ölkələrimizin regionları arasında əməkdaşlığa toxunan Boris Klimçukun sözlərinə görə, yaxın zamanlarda Bakı ilə Dnepropetrovsk, Qaradağ rayonu ilə Odessa vilayətinin İliçevsk şəhəri, Gəncə ilə Volın vilayətləri arasında dostluq və əməkdaşlıq haqqında müqavilələr imzalanacaq.

Humanitar sahədə əməkdaşlıqdan danışan səfir sabah Gülüstan sarayında Ukraynanın müstəqilliyinə həsr olunmuş qəbulda Ukraynadan gəlmiş qrupun çıxış edəcəyini bildirib. Qeyd olunan qrupun Lökbatan və Sumqayıtda da konsertlər proqramları ilə çıxışı gözlənilir. Mətbuat konfransının sonunda Boris Klimçuk Ukraynanın daşqınlardan zərər çəkmiş Qərb regionlarında fəlakətin nəticələrini aradan qaldırmaq üçün bölgəyə 5 min ton dizel yanacağı göndərdiyi üçün Azərbaycan hökuməti və şəxsən prezident İlham Əliyevə minnətdarlığını bildirib.