MDB

Ana səhifə

MDB

Özbəkistan Baş Prokurorluğu ölkə ərazisində basqın və terror törədən silahlı dəstələrin Qırğızıstandan gəldiyini açıqlayıb

27 may 2009 13:04 (UTC +04:00)

Bişkek. Ləman Ağayeva - APA. Özbəkistanın Baş Prokurorluğu mayın 25-dən 26-na keçən gecə Qırğızıstanla sərhəddə baş verən hadisələrlə başlı rəsmi məlumat yayıb. APA-nın Qazaxıstan və Mərkəzi Asiya üzrə müxbirinin məlumatına görə, açıqlamada bildirilir ki, mayın 26-na keçən gecə 2-3 quldur dəstəsi Əndican vilayətinin Xanabad şəhərindəki milis postuna silahlı basqın edib: “Post patrul xidməti əməkdaşları ilə yaranan atışma zamanı 1 milis və 1 quldur yaralanıb. Milis əməkdaşlarının müqavimətinə rast gələn quldurlar gecə vaxtı qaçıb gizlənə biliblər. Mayın 26-da isə Əndican şəhərinin Fitrət küçəsində naməlum kişi özünü partladıb. Nəticədə 1 milis əməkdaşı və bir neçə vətəndaş yaralanıb. İlkin istintaqın nəticələrinə əsasən quldur dəstələri Əndican vilayətinə qonşu Qırğızıstandan keçib”.
Qırğızıstanın Sərhəd Xidməti isə Özbəkistan Baş Prokurorluğunun məlumatını təkzib edərək sərhəd-buraxılış məntəqəsindən heç kimin qeyri-qanuni buraxılmadığını bəyan edib: “Özbəkistanın hüquq-mühafizə orqanları bu barədə hər hansı sübut təqdim etsələr, biz birgə əməliyyat tədbirləri keçirməyə və hadisələri törədən şəxslərin axtarışında kömək göstərməyə hazırıq”.