MDB

Ana səhifə

MDB

Tiflisdə baş vermiş dəmiryol qəzasının yekun səbəbləri barədə Gürcüstan tərəfi Azərbaycana məlumat verəcək

07 aprel 2010 19:19 (UTC +04:00)

Tiflis. Nizami Məmmədzadə-APA. Tiflisdə aprelin 2-də baş vermiş dəmiryol qəzasının səbəblərini araşdıran Azərbaycan və Gürcüstan dəmiryolu mütəxəssislərin iştirakı ilə yaradılan komissiyanın işi barədə hələlik mətbuata məlumat verilmir. Qəzanın nəticələri bu yaxınlarda Gürcüstan dəmiryolu tərəfindən baxılacaq və Azərbaycan dəmiryol rəhbərliyinə yekun nəticə barədə məlumat veriləcək. APA-nın Gürcüstan bürosunun məlumatına görə, bu barədə məlumatı jurnalistlərlə Azərbaycan dəmiryollarının Qapalı Səhmdar Cəmiyyətinin yük və kommersiya şöbəsinin rəisi Temur Məmmədov bildirib. «Gürcüstan dəmiryolçularının ilkin mövqeyində göstərilib ki, vaqonlar texniki cəhətdən nasazdır. Qeyd edim ki, həmin vaqonların istismar tarixi bizdə var, onlar tam bu günkü tələblərə yararlıdır. O vaqonlar böyük olduğu üçün onu Azərbaycan yük daşıma dəhlizində istifadə edir. Gürcüstan da buna qadağa qoymayıb. Yalnız qış aylarında Marabda-Axalkalaki sahəsində işləməyə icazə verilmir. Çünki orada qış vaxtında yollarda yük qaldırmaq çətin olur. Gürcüstan tərəfi qəza barədə öz rəyini deyib, amma professional rəyə oxşamır. Təəssüflər olsun ki, yük itkisi var. Yük itkisi hansı ərazidə baş verirsə, oranın sahibi o itkiyə cavabdehdir. Fikrimizcə, vaqonlar əsas yoldan əlavə yola çıxıb və nəticədə vaqonlar həmin yolun əyrisinə sığmayıb. Bunda Azərbaycan dəmiryolçularının günahı yoxdur. Bu yola səkkiz oxlu vaqonları qəbul etmək lazım deyildi. Bunu mütəxəssislər də təsdiq edir».

Azərbaycan Respublikasının TRACECA proqramı üzrə katibi Akif Mustafayev Gürcüstan ərazisindən yük daşıma dəhlizinə öz münasibətini açıqlayıb. «Dünən biz TRACECA-nın işçi qrupunda bu məsələyə də nəzər yetirdik. Əgər statistikaya baxsaq, yüklər çox sabit şəkildə daşınır. Azərbaycan və Gürcüstan arasında yükdaşıma məsələlərində heç bir hadisə baş verməyib. Mənfur qonşular belə bir fikir yaratmaq istəyirlər ki, bu dəhliz işə yaramır. TRACECA nəqliyyat dəhlizi ən qısa dəhlizdir. Bu dəhliz o biri dəhlizlərdən 1500 km daha qısadır. İkinci üstünlüyü odur ki, iqlim şəraiti burada daha yaxşıdır. Bir vaqonun aşması bu yolun təhlükəli olmasına dəlalət etmir. Son bir neçə il ərzində Güney Qafqazda heç bir qəza baş verməyib. Təhlükəsizlik məsələlərə gəlincə, mən qeyd etmək istəyirəm ki, son bir neçə il ərzində Rusiya tərəfindən bir neçə körpülərin partladılsa da bu dəhlizdə heç bir təhlükə baş verməyib. Azərbaycan dəmiryolu tezliklə tam modernləşdiriləcək. Bu sahədə inkişaf proqramı hazırlanıb. Bu yaxınlarda proqram prezident tərəfindən təsdiqlənəcək. Onda belə qəzalara da yer olmayacaq. Dünya Bankı bu layihə üçün 450 milyon dollar həcmində kredit ayırıb. Azərbaycan dəmiryolu bir neçə il ərzində tam yeniləşdiriləcək».

Qeyd edək ki, aprelin 2-də Tiflisdə yüklərin çeşidlənməsi parkında Azərbaycana məxsus 4 vaqonun aşması nəticəsində ARDNŞ-in Gürcüstan nümayəndəliyinə aid 180 ton dizel yanacağı dağılıb.