MDB

Ana səhifə

MDB

Tiflisdə TRACECA-nın xətti ilə ikigünlük konfrans-seminar keçirilir

07 aprel 2010 21:41 (UTC +04:00)

Tiflis. Nizami Məmmədzadə-APA. Tiflisdə Şereton-Metexi mehmanxanasında TRACECA-ya üzv olan ölkələrin iştirakı ilə seminar-konfrans keçirilir.

APA-nın Gürcüstan bürosunun məlumatına görə, konfrans-seminar TRACECA-nın rəhbərliyinin təşkilatçılığı ilə baş tutub. Tədbirdə 10 ölkədən nümayəndələr, xarici ekspertlər, eyni zamanda Gürcüstan, Azərbaycan, Özbəkistan, Türkmənistan, Ukrayna, Türkiyədən nümayəndələr qatılıb. Konfrans-seminarda «Yükdaşımalarda rəqəmsal taxoqrafın tətbiqi» mövzusunda treninqlər keçirilir. Tədbirdə Azərbaycan Beynəlxalq Avtomobil Daşıyıcılar Assosiyasiyasının baş katibi (ABADA) Orxan Əfəndiyev, “Turan” şirkətinin əməkdaşı Nicat Səfərli də iştirak edirlər.

ABADA-nın baş katibi Orxan Əfəndiyev APA-ya açıqlamasında bildirib ki, müzakirə olunan mövzu müasir zamanda çox aktualdır. «Əvvəllər yük daşıyan sürücülər dincəlmirdilər. İndi taxoqraf barədə Avropa qaydaları var. Tutaq ki, 4,5 saat maşın sürdükdən sonra sürücü 45 dəqiqə dincəlməlidir. Gün ərzində sürücülər 9 saat yol getməli, həm də dincəlməlidir. Maşında yerləşdirilmiş rəqəmsal taxoqrafda bunların hamısı qeyd olunacaq. Demək olar ki, bu rəqəmsal taxoqraf sürücünün iş rejimidir. Məqsəd yollarda olan qəzaları aradan qaldırmaqdır. Keçən ilin statistikasına baxsaq, Azərbaycanda 800 nəfərə yaxın insan həlak olub. Bunu təhlil etsək görərik ki, əsasən sürətin artırılması nəticəsində, eyni zamanda sürücünün yorğunluğundan, vaxtlı-vaxtında istirahət etməməsi və digər səbəblərdən qəzalar baş verib».

TRACECA-nın xətti ilə keçirilən konfrans-seminar 2 gün davam edəcək.