MDB

Ana səhifə

MDB

Sadaxlıda Aşıq Məhəmməd Sadaxlının 80 illik yubileyi keçirilib

13 may 2010 21:41 (UTC +04:00)

Sadaxlı.Nizami Məmmədzadə-APA. Bu gün sərhədyanı kənd olan Sadaxlıda ustad Aşıq Məhəmməd Sadaxlının 80 illik yubileyi qeyd olunub. APA-nın Gürcüstan bürosunun məlumatına görə, tədbir Azərbaycanın Gürcüstandakı səfirliyinin dəstəyi ilə həyata keçirilib. Yubiley tədbirində “Qarapapaqlar” jurnalının Baş redaktoru Akif Xansultanlı cıxış edib. Sonra Azərbaycanın Gürcüstandakı səfiri Namiq Əliyev ustad Aşıq Məhəmməd Sadaxlının 80 illik yubileyini təbrik edərək, ona İlham Əliyevin portreti toxunmuş kiçik xalça hədiyyə edib. Səfir çıxışında bildirib ki, Azərbaycan xalq yaradıcılığında getdikcə məşhurlaşan və şöhrət tapan aşıq sənəti ən gözəl bir sənətdir. “Musiqi tariximizi daha da zənginləşdirən aşıqların ifa etdiyi saz havaları Heydər Əliyev Fondunun köməyi ilə YUNESKO-nun qızıl fonduna daxil olub. Bu, Azərbaycanın gözəl və yaddaşlardan silinməz saz sənətinin qorunub saxlanması deməkdir.”

Tədbirdə Gürcüstan parlamentinin deputatı Azər Süleymanov, Azərbaycanlıların Mədəniyyət Mərkəzinin rəhbəri Fazil Həsənov, Azərbaycan Elmlər Akademiyasının Folklor İnstitutunun əməkdaşı, filologiya elmləri namizədi Elxan Məmmədli, AYB-nin Qazax şöbəsinin rəhbəri, şair Barat Vüsal, “Borçalı” cəmiyyətinin rəhbəri Zəlimxan Məmmədli, şairə Səadət Buta, Azərbaycan səfirliyinin əməkdaşı Fəxri Hacıyev və başqaları çıxış edərək ustad sənətkar Aşıq Məhəmməd Sadaxlının sazlı-sözlü dünyasının şifahi xalq yaradıcılığında özünəməxsus yer tutduğundan və ustad aşığın 80 yaşı tamam olmasına baxmayaraq, yenə də gənclik həvəsi ilə çalıb-oxumağından, onun özünəməxsus aşıq poeziyasından söhbət açıblar.

80 yaşlı ustad sənətkarın yubileyində İraqın Gürcüstandakı səfiri Seyid Muhəmməd Talib, Bakıdan, Qazaxdan, Tiflisdən, Qardabanidən, Marneulidən, Bolnisdən, eyni zamanda ətraf kəndlərdən gələn ziyalılar, Sadaxlı kənd sakinləri iştirak ediblər.

Tədbirin sonunda Aşıq Məhəmmədin oğlu Aşıq Mehman oxuduğu bir “Müxəmməs” ilə məclisə yekun vurub, yubilyar Aşıq Məhəmməd Sadaxlı onun 80 illik yubileyinə gələn qonaqlara, jurnalistlərə, səfirlik əməkdaşlarına və ictimaiyyat nümayəndələrinə təşəkkürünü bildirib.

Azərbaycanın Gürcüstandakı səfiri Namiq Əliyev APA-ya bildirib ki, bu tədbir axırıncı tədbir deyil, neçə belə tədbirlər keçirməyi fikirləşirik. Biz Gürcüstanda aşıqların yaradıcılığına diqqət göstəririk. Bildiyiniz kimi artıq neçə belə tədbirlər keçirmişik. Aşıq Əmrahın 100 illik yubileyini qeyd etmək olar. Yubiley üçün Aşıq Əmrahın yaradıcılığı ilə bağlı kitab da buraxmışıq.