MDB

Ana səhifə

MDB

Mahir Məmmədov: “Gürcüstanın energetika təhlükəsizliyi məhz Azərbaycan tərəfindən təmin olunub”

21 may 2010 04:39 (UTC +04:00)

Poti. Nizami Məmmədzadə-APA. “SOCAR Energy Georgia”nın baş direktoru Mahir Məmmədov bu barədə jurnalistlərə açıqlamasında qeyd edib. APA-nın Potidə olan əməkdaşının məlumatına görə, “Potinin qazlaşdırılması layihəsi”nin təqdimatında iştirak edən Mahir Məmmədov jurnalistlərə bildirib ki, bu şəhərdə görülən bütün işlər ARDNŞ-in törəmə müəssisəsi olan “SOCAR Georgia Gas”ın üç illik investisiya çərçivəsində həyata keçirilir. “Hal-hazırda qazlaşdırmanın ikinci ilində iri miqyaslı qazlaşdırma proqramı həyata keçirilməyə başlayıb. Bu çərçivədə Potidə 158 km qaz kəmərinin çəkilməsi nəzərdə tutulur. ”Poti Gürcüstanın Qara dəniz sahilində olan ən iri şəhərlərindən biridir. Bu regionda heç vaxt qaz kəməri olmayıb. Bizimlə danışıqlarda biz Gürcüstan dövləti ilə razılığa gəldik ki, dövlət buraya mağistral qaz kəməri çəkəcək və biz də bundan sonra Poti şəhərinə qaz verəcəyik. Biz çox şadıq ki, dövlət dediyinə əməl edir. Biz artıq layihələşdirmə işlərini qurtarmışıq. İndi Poti şəhərinin daxili qazlaşdırma işlərinə başlayırıq. Hal-hazırda su təchizatı layihəsi gedir və şəhərin küçələrində qazıntı aparılır. Bundan sonra biz müştərək təşkilatlarla birlikdə su və qaz borularını buraya qoyacağıq. Layihədə 16-17 min abonentin qazla təmin edilməsi göstərilib və 7-8 milyon dollar dəyərində maliyyə xərcləri olacaq. Ümumiyyətlə, Potidə 21 min potensial abonent var və eyni zamanda müxtəlif təyinatlı 174 obyektə də qaz verilməsini nəzərdə tutmuşuq.”

ARDNŞ-in Gürcüstan nümayəndəliyinin rəhbəri daha sonra bildirib ki, Gürcüstanda bütün gördüyümüz işlər birbaşa Azərbaycan Respublikasının prezidenti İlham Əliyevin tövsiyələri və tapşırığı ilə görülən işlərdir.”Bu gün Gürcüstanın energetika təhlükəsizliyi məhz Azərbaycan tərəfindən təmin olunub. Gürcüstanda ancaq yeganə Azərbaycan qazı var. Digər mənbə isə bizim bədnam qonşularımıza Rusiyadan gedən magistral qaz kəmərinin işləməsidir. Gürcüstan dövləti bu kəməri öz ərazisindən keçirmək üçün müəyyən həcmdə qaz alır. Bu, məcburi bir proqramdır. Bunun Gürcüstanın energetika təhlükəsizliyində və daxili təminatında elə bir rolu yoxdur. Gürcüstan tamamilə Rusiyadan gələn qaz kəmərinin digər ölkəyə keçməyindən asılı deyil. Əgər Gürcüstan dövləti tərəfindən xahiş olarsa, Azərbaycan dövləti, ilk növbədə Dövlət Neft Şirkəti xahişi nəzərə alıb, qazın Gürcüstana satışını artıra bilər.”

Mahir Məmmədov indiyədək bu ölkəyə nə qədər investisiya yatırıldığını da deyib.
“Gürcüstana ilkin variantda 80 milyon dollar yatırılıb, 10 milyon dollar da reabilitasiya işlərinin görülməsi üçün investisiya qoyulub. Bu ölkəyə qoyulan investisiya cəmi 90 milyonu təşkil edir. Bunun artıq 37 milyon dolları xərclənib. Qazlaşdırmanın ilk ili planlı şəkildə yerinə yetirilib. Bu il də təxminən 23-26 milyon dollar vəsait lazımdır. Poti proqramının yerinə yetirilməsi üçün qeyd etdiyim kimi magistral qaz kəmərinin çəkilməsi qəbul olunub.”

M. Məmmədov Gürcüstana verilən qazın həcmini də açıqlayıb. “Gürcüstanın bir milyard kubmetrdən çox qaza sosial tələbatı var, həm də burada 250-300 milyon kubmetrə yaxın qaza kommersiya tələbatı var. Bütün bunlardan sonra elə bilirəm ki, biz üç il ərzində bu ölkədə qazlaşdırma proqramını uğurla həyata keçirəcəyik.”