MDB

Ana səhifə

MDB

Cületta Giorqadze: «Gürcüstan mayın 30-da keçiriləcək seçkilərə tam hazırdır»

21 may 2010 22:18 (UTC +04:00)

Tiflis. Nizami Məmmədzadə-APA. Mayın 30-da Gürcüstanda yerli özünüidarəetmə orqanlarına seçkilər başlayacaq. APA-nın Gürcüstan bürosunun məlumatına görə, Gürcüstan Mərkəzi Seçki Komissiyasının spikeri Cületta Giorqadze ölkədə seçki ilə əlaqədar görülən işlər barədə və mayın 30-da seçkilərin gedişi zamanı qarşıda duran vəzifələr barədə APA-ya açıqlama verib. Onun sözlərinə görə, Gürcüstan mayın 30-da keçiriləcək seçkilərə tam hazırdır. Həmin gün Sakrebuloya (Bələdiyyələrə) seçkilər keçiriləcək. Sakrebuloya xalq tərəfindən majoritar və proporsional qaydada namizədlər irəli sürülür və seçicilər səs vermə yolu ilə seçirlər. “Seçkilər bütün Gürcüstan ərazisində keçirilir. Bu seçkilərdə Tiflis şəhər merinin seçkisi olacaq. Belə bir seçki ilk dəfədir ki, Gürcüstanda keçirilir. Seçkilərdə eyni zamanda 3 nəfər majoritar deputatlığa namizədin seçkisi də keçiriləcək. Gürcüstanda 73 ərazi seçki dairəsi, 3.600-dən çox seçki məntəqəsi fəaliyyət göstərir. Məntəqələrdə seçki üçün bütün lazım olan hazırlıq görülüb və tam hazırdır. Mərkəzi Seçki Komissiyası (MSK) artıq iki aydır ki, intensiv işləyir.

MSK-nın spikeri seçicilərlə aparılan iş barədə məlumat verib. O, qeyd edib ki, biz ilk öncə seçicilərin siyahısı üzərində iş apardıq. Bu siyahılarda heç bir problem yoxdur və şəffaf və dəqiqliklə yazılıb. Seçici siyahılarının yazılmasında siyasi partiyalar bizə əllərindən gələn köməyi göstərdilər. Komissiya seçicilərə namizədlər barədə istənilən məlumatı vaxtında çatdırıb. Biz eyni zamanda seçkilər barədə yerli QHT-lərlə və bəzi beynəlxalq təşkilatlarla işlədik. Onlar bizə çox ciddi şəkildə kömək göstərdilər. Ən başlıca məsələlərdən biri də MSK-ya daxil olan şikayətlərin yoxlanılması oldu. Biz MSK-ya gələn şikayətləri vaxtında və yerində yoxlayıb, obyektiv cavablar verdik. Bu şikayətlər eyni zamanda MSK-nın veb saytında yerləşdirilib. Hansı seçici maraqlansa, oxuyub tanış ola bilər. Qeyd edim ki, indiyədək beynəlxalq və yerli təşkilatlar tərəfindən heç bir şikayət almamışıq.
MSK spikeri seçkilərdə iştirak etmək üçün 14 partiya və 3 blokun qeydiyyatdan keçdiyini söyləyib. Eyni zamanda o, Tiflis Şəhər Merliyinə 9 nəfər namizədin seçkilərdə iştirak etmək üçün qeydə alındığını deyib. “Onlar bütün Gürcüstan ərazisində fəaliyyət göstərən seçkilərdə iştirak edirlər. Lakin bir neçə dairədə bəzi namizədlərin siyahısı və majoritar namizədlərin adları yoxdur. Bunlara baxmayaraq MSK onlara ixtiyar verib ki, bütün Gürcüstan ərazisində qeydiyyatdan keçsinlər. Tiflisdə majoritar və proporsional sistem üzrə seçkilər baş tutacaq. Seçicilər Tiflis Şəhər Merliyinə namizədi seçəcəklər. Yalnız Tiflisdə yaşayan seçicilər 3 bülleten alacaq, Gürcüstanın digər regionlarında olan seçicilər isə 2 bülletenlə təmin olunacaqlar.

Mayın 20-nə qədər 32 yerli təşkilat qeydiyyatdan keçib, onlar seçkilərdə monitorinq aparacaq. Eyni zamanda onlarla birlikdə beynəlxalq müşahidəçilər də iştirak edəcək. İndiyədək 22 beynəlxalq müşahidəçi qeydiyyatdan keçib. Onların qeydiyyatdan keçmə vaxtı mayın 23-də sona çatır.

Cületta Giorqadze açıqlamasında jurnalistlərin prezident seçkilərindən fərqli olaraq bu seçkiyə marağının çox az olduğunu bildirib. «Biz hər gün beynəlxalq jurnalistlərdən qeydiyyat üçün müraciət qəbul edirik. Fikirləşirik ki, seçkilərdə çox ciddi jurnalistlər iştirak edəcək. Hesab edirik ki, KİV vasitələrinin fəaliyyəti üçün lazım ola biləcək şəraiti yarada biləcəyik. Onlar intensiv şəkildə seçkilər barədə informasiya və reportajlar verə biləcəklər. Jurnalistlərlə mayın 30-da işləmək üçün xüsusi planımız var. Hər 3 saatdan bir jurnalistlər üçün brifinq keçiriləcək, onlar mütəmadi şəkildə MSK-nın informasiyaları ilə tanış olacaq və müəyyən süjetlərin çəkilməsi üçün onlara şərait yaradacağıq. Seçki günü MSK-da mətbuat mərkəzi 24 saat işləyəcək və bütün jurnalist-müşahidəçilər sözsüz ki, bizimlə birlikdə işləyə biləcək və onlar üçün şərait olacaq. Burada kompüter mərkəzi işləyəcək və eyni zamanda informasiyaları ötürmək üçün pulsuz internetdən istifadə edə biləcəklər. Jurnalistlər üçün qeydiyyatdan vaxtı mayın 27-də sona çatır. Hələ vaxt var, istər beynəlxalq müşahidəçilər, istərsə də KİV öz siyahılarını MSK-ya təqdim edə bilərlər. İndiyədək ATƏT tərəfdən 150 müşahidəçi qeydiyyatdan keçib. Onların da qeydiyyat üçün siyahı təqdim vaxtı mayın 28-də başa çatır».

APA-nın Gürcüstan bürosunun məlumatına görə, mayın 21-dən başlayaraq Gürcüstanda keçiriləcək seçkilər üçün bülletenlərin çapına başlanılıb. MSK-dan verilən xəbərə görə, seçki bülletenləri gürcü, Azərbaycan, erməni və rus dillərində çap olunacaq.