MDB

Ana səhifə

MDB

Tiflisdə «Gürcüstanda rus dilli KİV-in vəziyyəti» mövzusunda dəyirmi masa keçirilib

04 iyun 2010 21:05 (UTC +04:00)

Tiflis. Nizami Məmmədzadə-APA. Gürcüstan paytaxtında “RİA Novosti” beynəlxalq mətbuat mərkəzində “Gürcüstanda rus dilli KİV-in vəziyyəti” mövzusunda dəyirmi masa keçirilib. APA-nın Gürcüstan bürosunun məlumatına görə, mövzu ilə əlaqədar aparılan müzakirələrdə “Svobodnaə Qruziə” qəzetinin baş redaktoru Tato Lasxişvili, publisist, politoloq Arno Xidirbeqişvili, Cənubi Qafqaz Regional Təhlükəsizlik İnstitutunun direktoru, politoloq Aleksandr Rusetskiy, “Russkiy klub” jurnalının baş redaktoru Aleksandr Svatikov və «newsgeorgia. ru» (Новости Грузия) informasiya agentliyinin baş redaktoru Yelena İmedaşvili iştirak ediblər. Dəyirmi masa arxasında Gürcüstanda rus dilli əhalinin azalmasından, mətbuat məhsuluna alıcılıq qabiliyyətin olmamasından, reklam bazarının zəifliyindən və dövlətin rus dilli mətbuata qayğısı barədə fikir mübadiləsi aparılıb. Dəyirmi masanın iştirakçıları müasir şərait baxımından mətbuatın problemləri və inkişafı üçün potensial auditoriyanın olmaması, KİV-də kadr çatışmamazlığı haqqında fikirlər yürüdüb və ölkədə böyüyən gəncliyin rus dilinə münasibətin tamamilə zəif olduğunu, hətta yeni yetişən jurnalist nəslinin bu dildən çox ingilis və gürcü dilini bildiklərini, eyni zamanda cəmiyyətdə bu dilə ehtiyacın getdikcə azaldığı qeyd ediblər.
Dəyirmi masa arxasında çıxış edən iştirakçılar bildiriblər ki, Cənubi Qafqazda milli baxımdan həyat tərzi səviyyəsinin aşağı olması şəraitində rus dilli KİV-in inkişafı hələ mümkün deyil. Getdikcə rus dili aradan çıxır və dörd il bundan əvvəlki vəziyyət indi yoxdur. İştirakçılar bildiriblər ki, qəzet və jurnalların tirajı çox azdır, reklam bazarı zəifdir. Publisist, politoloq Arno Xidirbeqişvili rus dilli jurnalistlərin Gürcüstanda bir assosiasiyada birləşməyi təklifini irəli sürüb. Onun bu təklifi iştirakçılar tərəfindən müzakirə obyektinə çevrilib və bu birliyin vacibliyi qeyd olunub.

A. Xidirbeqişvili bildirib ki, bununla biz birləşib bir komanda ilə Gürcüstanda rus dilli jurnalistikanın inkişafına təkan verəcək və rus dilini saxlamaq və onu populyarlaşdırmaq üçün xüsusi proqram işləyəcəyik. «İndi bizim uşaqlarımız rus dilini bilmirlər. Onlar bizim ümumi tariximizi bilmədən böyüyürlər. Deməli, onlar bir-birilərini sevmirlər. Bir nəfər meydanda əsgər deyil. Gəlin, bilikdə rus dilini xilas edək, çünki bizim eyni məzhəbdə olan pravoslav dinimiz var və Böyük Vətən Müharibəsində faşizm üzərində Böyük Qələbə naminə xalqlarımız birləşdi. İndi də birləşib rus dilini xilas etmək lazımdır. Bu gün rus dili ilə Kiyevə qədər getmək olar, amma Tiflisə qədər yox. Burada rus dilində kimdənsə nə soruşsan, cavab əvəzinə təhqir eşidərsən».

Cənubi Qafqaz Regional Təhlükəsizlik İnstitutunun direktoru, politoloq Aleksandr Rusetskiy APA-ya açıqlamasında bildirib ki, sovet dönəmində, eləcə də ondan sonra bizim çap etdiyimiz “Rezonansi” qəzetinin Azərbaycanda, xüsusilə Bakıda 1,5 min nüsxəsini yayırdıq. Eyni zamanda regionlarda və beynəlxalq aləmdə bu mətbuata tələb vardı. İndi belə deyil. Düşünürəm ki, mətbuata dövlət qayğısı vacibdir”.

İyunin 4-də Tiflisdə “RİA Novosti”ndə baş tutan tədbirdə qərara alınıb ki, jurnalistlərin professionallığı, iş təcrübəsi yeni nəslə ötürülsün və gənc jurnalist kadrlarının işə qəbul edilməsi üçün şərait yaradılsın, rus dilli mətbuatın inkişafı üçün proqram işlənsin və Gürcüstanda bu mətbuatı inkişaf etdirmək üçün bir assosiasiya ətrafında birləşmək üçün yeni metod və imkanlar axtarılsın.