Mədəniyyət siyasəti

Mədəniyyət siyasəti

Əbülfəs Qarayev: “Muzeylərdə işləyən bələdçilər orada olan eksponatların tarixini belə bilmirlər”

23 iyun 2009 09:45 (UTC +04:00)

Bakı. Ülkər Qasımova-APA. Bu gün mədəniyyət və turizm naziri Əbülfəs Qarayev Azərbaycan prezidentinin cari ilin mayın 22-də imzaladığı sərəncamına əsasən təsdiq edilmiş “(2009-2014) Azərbaycanın regionlarında fəaliyyət göstərən muzeylərin müasir standartlara uyğun təmirinə, yeni avadanlıq və zəruri eksponatlarla təchizatına dair xüsusi tədbirləri planı”nın yerinə yetirilməsi ilə bağlı müşavirə keçirib. APA-nın məlumatına görə, Muzey Mərkəzində keçirilən müşavirədə həm paytaxt, həm də regionlarda fəaliyyət göstərən muzey direktorları iştirak ediblər.

Müşavirədə çıxış edən mədəniyyət və turizm naziri, Azərbaycan regionlarında muzeylərin aqibətinin heç də ürəkaçan olmadığını vurğulayıb. Nazir dövlət başçısının sözügedən sərəncamının zamanında imzalandığını qeyd edib: “Düzdür, bu illər ərzində muzey sahəsində bir çox uğurlar da əldə etdiyimizi deməliyik. Paytaxtda fəaliyyət göstərən muzeylərdə təmir-bərpa işlərinin aparılması, Xalça Muzeyinin tikintisinə başlanılması, bir sıra tanınmış xarici muzeylərlə əməkdaşlığı bu sahədə əldə olunmuş nailiyyət kimi qeyd etmək olar. Ancaq bu gün muzey sahəsində mövcud problemlərdən yan ötmək haqsızlıqdır. Çox təəssüflənirəm ki, son illər dövrdə tariximizlə maraqlanan gənc nəslin sayı azalıb, muzeylərə maraq həddindən artıq aşağı düşüb. Bu problemlərin həll olunmasına çalışmalıyıq”. Ə. Qarayev bildirib ki, bu gün regionlarda əsas problem muzeylərdə fəaliyyət göstərən bələdçilərlə bağlıdır: “Həqiqətən də bunu demək hər birimiz üçün çox ağırdır. Muzeylərdə işləyən bələdçilər fəaliyyət göstərdikləri muzeylərdə yerləşdirilən eksponatların tarixini belə bilmirlər. Ümumiyyətlə bu bütün bələdçilərə aiddir. Bələdçilər Azərbaycan gələn turistlərə Qız Qalasının müxtəlif əsrlərdə tikildiyini deyir. Bu biabırçılıqdır. Biz tariximizi öyrənməsək, bilməsək, bunu kim edəcək? Bələdçilərin dil bilgisinin olmaması da xoşagəlməz haldır. Xarici qonaqların qarşısına çıxarmağa bələdçi tapmamaq biabırçılıqdır. Ona görə də Azərbaycanda fəaliyyət göstərən bütün bələdçilər attestasiyadan keçməlidir”.

Mədəniyyət və turizm naziri muzeylərin çox səliqəsiz halda fəaliyyət göstərdiyini də qeyd edib: “Muzeylərdə səliqə-sahmana, eksponatların xüsusi qaydada saxlanılmasına, eyni zamanda muzeylərdəki eksponatların elektron variantının hazırlanmasına diqqət edilmir. Muzeylərin internet ünvanlarının açılması çox vacib bir işdir. Bütün bu işləri görmək üçün beş il vaxtımız var. Bu beş il ərzində bütün bunları həyata keçirsək, öz tariximizi, mədəniyyətimizi qorumuş olacağıq, əks-təqdirdə bütün bunlar əlimizdən çıxacaq”. Müşavirədə çıxış edən AMEA-nın vitse-prezidenti, Azərbaycan Milli Tarix Muzeyinin direktoru Nailə Vəlixanlı muzeylərdə fondların yenilənməsinin vacibliyini vurğulayıb. Muzey rəhbəri bütün bu problemlərin aradan qalxması üçün muzeylərin gücləndirilmiş iş rejimində işləyəcəyini qeyd edib.