Mədəniyyət siyasəti

Mədəniyyət siyasəti

Rusiyada Azərbaycan Mədəniyyət Günlərinin təntənəli açılış mərasimi keçirilib - FOTOSESSİYA

Rusiyada Azərbaycan Mədəniyyət Günlərinin təntənəli açılış mərasimi keçirilib - <font color=red>FOTOSESSİYA</font>

01 iyul 2009 08:03 (UTC +04:00)

Moskva. R. Mətləboğlu-APA. Moskvada Rusiyada Azərbaycan Mədəniyyət Günlərinin təntənəli açılış mərasimi keçirilib. APA-nın Moskvadakı müxbirinin verdiyi məlumata görə, ilk olaraq Kremlin Sütunlu Zalının foyesində azərbaycanlı fotoqrafların əsərlərindən ibarət sərgi açılıb. Sərginin ardınca keçirilən mərasimdə Rusiya mədəniyyət nazirinin müavini Aleksandr Qolutva və Azərbaycanın mədəniyyət və turizm naziri Əbülfəs Qarayev çıxış edərək Rusiyada Azərbaycan Mədəniyyət Günlərinin başlaması münasibətilə iştirakçıları təbrik ediblər.

Aleksandr Qolutva iki ölkə arasında humanitar sahədə əməkdaşlığın yüksək səviyyəsindən məmnunluq ifadə edib, mədəni əməkdaşlığın yüksələn xətlə inkişaf etdiyini vurğulayıb: “Ölkələrimiz arasında aktiv mədəniyyət mübadiləsini ləngidən yeganə amil odur ki, mədəni əlaqələri inkişaf etdirmək arzusu bəzən maliyyə imkanları ilə üst-üstə düşmür. Lakin bu amil bizləri münasibətlərimizi daha da möhkəmlətmək hissindən çəkindirmir”.

Azərbaycanın mədəniyyət və turizm naziri Əbülfəs Qarayev çıxışında qeyd edib ki, iki ölkə arasında mədəni əlaqələr Azərbaycan və Rusiyanın siyasi, iqtisadi-ticari, humanitar və digər sferalarında ikitərəfli əməkdaşlıq münasibətləri ilə harmonik olaraq inkişaf edir: “Azərbaycan və Rusiya arasında bugünkü mədəniyyətlər mübadiləsi Rusiya prezidenti Dmitri Medvedyevin Azərbaycana səfərindən sonra gerçəkləşməsi həm də simvolik məna daşıyır. Hər iki prezidentin imzaladığı sənədlər ölkələrimizi qarşılıqlı şəkildə maraqlandıran iqtisadi proqramların, siyasi münasibətlərin daha da inkişafı üçün gözəl əsas yaradıb”.

Əbülfəs Qarayev bu dəfə Azərbaycana mədəniyyətinin bir qədər qeyri-adi rakursda təmsil olunacağını deyib. Onun sözlərinə görə, iki il əvvəl maestro Mstislav Rostropoviçin təşəbbüsü ilə Azərbaycanda uşaq simfonik orkestri yaradılıb: “Bu orkestr il yarım ərzində Avropa və dünyanın bir çox şəhərlərində uğurla çıxış edib və indi həmin orkestr Moskva auditoriyası qarşısında çıxış etmək şərəfinə nail olub”. Əbülfəs Qarayev Azərbaycan nümayəndə heyətinin Moskvadan sonra Tatarıstanda da çıxış edəcəyini qeyd edib.

Proqramın bədii hissəsində Azərbaycan Dövlət Uşaq-Gənclər Simfonik Orkestri bədii rəhbər və dirijor Teymur Göyçayevin rəhbərliyi altında çıxış edib. Orkestr Üzeyir Hacıbəyov, Qara Qarayev, Brams, Motsart, Vasif Adıgözəlov, Vaqif Mustafazadə, Ştraus, Niyazi, Rimski-Korsakov, Fikrət Əmirov və digər görkəmli bəstəkarların əsərlərini ifa edib. Ümumrespublika müsabiqəsinin laureatı Elməddin İbrahimovun ifa etdiyi “Qarabağ şikəstəsi”, Bakı Xoreoqrafiya Məktəbinin tələbələrinin ifasında “Arşın mal alan” komediyasından uvertüra və “Mənim Azərbaycanım” süitası tamaşaçıların gurultulu alqışlarına səbəb olub. Proqramda vokalçı İsmayıl Yunusov da altında italyan mahnısı “Camayka” və Azərbaycan xalq mahnısı “Qalalıyam”ı alqışlar altında ifa edib.