Mədəniyyət siyasəti

Mədəniyyət siyasəti

“Azərbaycan-Avropa Şurası mədəni əməkdaşlığı: İmkanlar və perspektivlər” mövzusunda tədbir keçirilib

08 iyul 2009 10:37 (UTC +04:00)

Bakı. Ülkər Qasımova - APA. Bakıda Avropa Şurasının 60 illik yubileyi çərçivəsində “Azərbaycan-Avropa Şurası mədəni əməkdaşlığı: İmkanlar və perspektivlər” mövzusunda tədbir keçirilib. APA-nın məlumatına görə, tədbirdə çıxış edən mədəniyyət və turizm naziri Əbülfəs Qarayev Avropa Şurasının 60 illiyinin Azərbaycanda qeyd olunmasını önəmli hadisə kimi qiymətləndirib: “Avropa Şurası 60 illik fəaliyyəti dövründə böyük Avropa ailəsinin yaranmasına səbəb olub. Azərbaycan səkkiz ildir Avropa Şurasının üzvüdür və bu illər ərzində birgə həyata keçirilən layihələr çox olub. Ötən il Azərbaycanda Avropa Şurası ölkələri mədəniyyət nazirlərinin toplantısı keçirilib və bu toplantıya ilk dəfə olaraq bir neçə islam ölkəsinin mədəniyyət nazirləri də qoşulub. Bakı prosesinin davam etməsi bizim marağımızdadır. Bakı İslam Mədəniyyətinin Paytaxtı ili çərçivəsində bu dialoq davam edəcək”.
Avropa Şurası baş katibinin Azərbaycandakı xüsusi nümayəndəsi Veronika Kotek 60 il ərzində Avropa Şurasının qazandığı uğurlardan danışıb: “İndi dövr dəyişib, dünya 60 il əvvəlki dünya deyil. Avropa Şurası da öz üsullarını və metodlarını müasir dövrə adaptasiya etməlidir”.
Avropa Şurasının Mədəniyyət, mədəni və təbiət irsi üzrə Departamentinin direktoru Robert Palmer isə Azərbaycanın Avropa Şurasının həyata keçirdiyi bütün layihələrə dəstək verdiyini söyləyib.
Qeyd edək ki, tədbirdə xarici ölkələrin Azərbaycandakı səfirliklərinin, beynəlxalq təşkilatların nümayəndəliklərinin təmsilçiləri, bir sıra dövlət qurumlarının və vətəndaş cəmiyyətinin nümayəndələri iştirak edib. Günün ikinci yarısında Avropa Şurasının “Sənətçilər dialoq naminə” layihəsinə həsr olunmuş I ekspert görüşü başlayıb. Görüş iki gün davam edəcək. Xatırladaq ki, “Sənətçilər dialoq naminə” layihəsinin əsası Azərbaycanın təşəbbüsü ilə 2008-ci il 2-3 dekabr tarixində keçirilən Avropa Şurasına üzv dövlətlərin mədəniyyət nazirlərinin konfransında qoyulub. Layihənin məqsədi Avropa və qonşu regionlarda yerləşən dövlətlərin sənət adamları vasitəsilə sivilizasiyalar və mədəniyyətlərarası dialoqu təşviq etmək və bu istiqamətdə layihələr həyata keçirməkdir.