Mədəniyyət siyasəti

Ana səhifə

Mədəniyyət siyasəti

Azərbaycanda ilk dəfə olaraq Beynəlxalq Musiqi Həftəsi keçiriləcək

09 sentyabr 2009 14:47 (UTC +04:00)

Bakı. Ülkər Qasımova - APA. Azərbaycanda ilk dəfə olaraq Beynəlxalq Musiqi Həftəsi keçiriləcək. Mədəniyyət və Turizm Nazirliyinin incəsənət şöbəsinin müdiri Fərəh Əliyevanın APA-ya verdiyi məlumata görə, 17-25 sentyabrda Mədəniyyət və Turizm Nazirliyinin təşkilatçılığı ilə baş tutacaq festival çərçivəsində ilk tədbir sentyabrın 17-də Niyazinin ev muzeyində bu muzeyin yaradılmasının 15 illiyi və Azərbaycanın klassik bəstəkarlarından biri olan Zülfüqar Hacıbəylinin anadan olmasının 125 illiyi münasibəti ilə keçiriləcək.

Həmin gün Azərbaycan Dövlət Filarmoniyasında Meksikadan dəvət olunmuş tanınmış dirijor Enriki Batisin dirijorluğu ilə konsert keçiriləcək. Üzeyir Hacıbəyli adına Azərbaycan Dövlət Simfonik Orkestrinin müşayiəti ilə keçiriləcək konsertdə pianoçu Murad Hüseynov solist olacaq. Sentyabrın 18-də isə həm paytaxtda, həm də regionlarda dahi Azərbaycan bəstəkarı Üzeyir Hacıbəylinin doğum günü münasibəti ilə tədbirlər keçiriləcək. Ənənəvi olaraq bu il də mədəniyyət xadimləri sentyabrın 18-də Fəxri Xiyabanda Üzeyir Hacıbəylinin və digər dahi Azərbaycan bəstəkarlarının məzarlarını ziyarət edəcəklər. Daha sonra isə Üzeyir Hacıbəyli adına Bakı Musiqi Akademiyasının qarşısında böyük konsert proqramı keçiriləcək.

Tədbirlər Üzeyir Hacıbəylinin Ev Muzeyində, Mirzə Fətəli Axundov adına Azərbaycan Milli Kitabxanada davam etdiriləcək. Milli Kitabxanada “Üzeyir Hacıbəyli və biblioqrafiya ” kitabının təqdimat mərasiminin keçirilməsi nəzərdə tutulur. Həmin gün həm Üzeyir Musiqi Günü, həm də Beynəlxalq Musiqi Festivalı çərçivəsində Azərbaycan Dövlət Akademik Opera və Balet Teatrının səhnəsində TÜRKSOY çərçivəsində Üzeyir Hacıbəylinin “Koroğlu” operası nümayiş etdiriləcək. Sentyabrın 18-i və 19-da isə Azərbaycan Dövlət Musiqili Komediya Teatrında Üzeyir Hacıbəylinin “Arşın mal alan” operettasının premyerasının keçirilməsi planlaşdırılır. Sentyabrın 18-də Bədii Sərgi Salonunda “Azərbaycan təsviri sənətində musiqi obrazları” sərgisi açılacaq. Sentyabrın 19-da Ağcabədidə fəaliyyət göstərən Qarabağ Muğam Mərkəzində Musiqi Gününə həsr olunmuş Azərbaycan Dövlət Muğam Teatrının və Azərbaycanın incəsənət xadimlərinin iştirakı ilə konsert proqramı keçiriləcək. Beynəlxalq Musiqi Festivalı çərçivəsində sentyabrın 20-də Azərbaycan Dövlət Akademik Opera və Balet Teatrında Zülfüqar Hacıbəylinin 125 illiyi münasibəti ilə “Aşıq Qərib” operası nümayiş etdiriləcək. Sentyabrın 22-də tarzən Əhsən Dadaşovun 85 illiyi münasibəti ilə tədbirin keçirilməsi, sentyabrın 23-də Üzeyir Hacıbəylinin ev Muzeyində Mir Möshün Nəvvaba həsr olunmuş tədbirin təşkili və 25-də Azərbaycan Dövlət Filarmoniyasında tanınmış dirijor Maksim Vinqerevin rəhbərliyi altında konsert proqramının keçirilməsi planlaşdırılır.