Mədəniyyət siyasəti

Ana səhifə

Mədəniyyət siyasəti

Əbülfəs Qarayev: “I Bakı Beynəlxalq Kitab Sərgi-Yarmarkasının gedişindən məmnunam”

11 sentyabr 2009 11:41 (UTC +04:00)

Bakı. Ülkər Qasımova-APA. “Azərbaycanda poliqrafiya işçilərinin, nəşriyyat evlərinin vahid bir assosiasiyası yaradılacaq. Biz bu planımızı çox yaxın vaxtlarda həyata keçirməyi düşünürük. Artıq bununla bağlı təkliflər Mədəniyyət və Turizm Nazirliyinə təqdim olunub. Bu layihənin gerçəkləşəcəyinə ümid edirəm”. APA-nın məlumatına görə, bu sözləri mədəniyyət və turizm naziri Əbülfəs Qarayev I Bakı Beynəlxalq Kitab Sərgi-Yarmarkasına həsr olunmuş mətbuat konfransında açıqlayıb.

Nazir keçirilən kitab sərgi-yarmarkasının çox yüksək səviyyədə gerçəkləşdiyindən məmnunluğunu dilə gətirib: “I Bakı Beynəlxalq Kitab Sərgi-Yarmarkasının işi və gedişi hamı kimi, məni də çox qane edir. Keçirdiyimiz bu tədbir beynəlxalq tədbirlərin cədvəlinə daxil olsa, bu sərgi-yarmarkanı hər il keçirməyi düşünürük. Bilirsiniz ki, dünyanın ən məşhur Strasburq, Moskva kitab yarmarkaları çox böyük siyasi xarakter daşıyır. Bununla ölkənin mədəniyyətə, biliyə, savada, intellektə münasibətin dərəcəsi müəyyənləşdirilir. Hesab edirəm ki, bu sərgi ənənəvi olaraq keçirilməlidir və burada daha geniş imkanları əldə etməliyik. Kitab aləmi dünyada çox böyük diqqətlə izlənir. Bizim keçirdiyimiz sərgiyə xarici ölkələrin maraq göstərməsi və qatılması bunun bariz nümunəsidir. Bu sahənin peşəkarlarının bu sərgidə iştirakı tamamilə başqa bir əhəmiyyət daşıyır. Ölkəmizdə aparılan mədəniyyət siyasəti nəticəsində bu gün müxtəlif ölkələrin kitabxanalarında Azərbaycanda nəşr olunmuş kitabların yerləşdirilməsi bu mənzərəni tam aydın göstərir. Bu kitabxanaların özləri bizim kitabları əldə etməkdə maraqlıdır. Bu o deməkdir ki, Azərbaycanda bu gün mövcud olan və nəşr edilməsi nəzərdə tutulan ədəbiyyat dünyanın müxtəlif kitabxanalarında özünə yer tapacaq. Bu olduqca böyük bir siyasi xarakter daşıyan məsələdir”.

Ə. Qarayev qeyd edib ki, milli kitabxanaların sərgiyə böyük diqqəti Azərbaycanın artıq dünya kitab məkanında özünəməxsus bir yer tutmasından xəbər verir: “Bu sərgi-yarmarka dövlət başçısının tapşırığı əsasında həyata keçirilir. Azərbaycanın bütün nəşriyyat və poliqrafiya evlərinin, eyni zamanda müxtəlif sahələrin çap evləri də öz məhsulları ilə sərgidə təmsil olunurlar. Sərgi çərçivəsində dəbiyyatla, poeziya ilə bağlı, eyni zamanda Azərbaycan mədəniyyəti, tarixi ilə bağlı kitablarının təqdimatı keçiriləcək. İnanıram ki, Azərbaycan kitabxanaları bu sərgidən sonra daha da zənginləşəcək, insanların kitaba diqqəti, marağı daha da artacaq. Ümidvaram ki, sərgi insanlarda kitaba həvəsi artıracaq və kitab hər bir Azərbaycan vətəndaşının həyatının ayrılmaz bir hissəsinə çevriləcək”.

Nazirin sözlərinə görə, bu ilin sonuna kimi Mədəniyyət və Turizm Nazirliyinin təşkilatçılığı ilə “Bakı - İslam Mədəniyyətinin Paytaxtı” İli çərçivəsində çox zəngin və gərgin bir proqram hazırlanıb. Sentyabrın 15-də Azərbaycan Dövlət Gənc Tamaşaçılar Teatrının qarşısında respublikada fəaliyyət göstərən bütün teatrların mövsüm açılışı keçiriləcək. Təntənəli açılış mərasimində teatrlar növbəti mövsümə hazırlıqları ilə bağlı məlumatlar verəcəklər: “Sentyabrın 17-dən etibarən Azərbaycanda Beynəlxalq Musiqi Həftəsi keçiriləcək ki, bu tədbiri də çox yüksək səviyyədə həyata keçməsinə çalışırıq. Sentyabrın 18-də isə Üzeyir Hacıbəylinin doğum günü münasibəti ilə əlaqədar bir sıra tədbirlərimiz olacaq. Həmin gün Heydər Əliyev Sarayında “Şərq-Qərb” Kinofestivalının açılışı olacaq. Eyni zamanda ilin sonuna kimi Bakıda “Bakı gecələri” mahnı müsabiqəsi, beynəlxalq rəqs festivalları keçiriləcək. Dekabrın sonuna qədər tək paytaxtı deyil, bütün respublikanı əhatə edəcək çoxsaylı tədbirlər keçirməyi qarşımıza məqsəd qoymuşuq”.