Mədəniyyət siyasəti

Ana səhifə

Mədəniyyət siyasəti

Fərhad Bədəlbəyli: “Biz hamımız Üzeyir bəyin çörəyini yeyirik”

18 sentyabr 2009 10:53 (UTC +04:00)

Bakı. Ülkər Qasımova – APA. “Üzeyir bəy Azərbaycan musiqisinin peyğəmbəridir. Biz hamımız Üzeyir bəyin çörəyini yeyirik. Üzeyir bəy olmasaydı, Azərbaycanda nə musiqi təhsili, nə simfonik muğam, nə balet, nə caz-muğam, ümumiyyətlə, heç bir şey olmayacaqdı. Bir adam bütün bunlara nail oldu. Azərbaycan musiqisi onun açdığı yolla inkişaf edir”. Bu sözləri APA-ya açıqlamasında Bakı Musiqi Akademiyasının rektoru, xalq artisti Fərhad Bədəlbəyli deyib. O bildirib ki, Üzeyir Hacıbəylinin doğum gününün bayram kimi qeyd edilməsi çox möhtəşəm hadisədir: “Çox arzulayıram ki, bu günü Şuşada da qeyd edək. Xoşbəxtəm ki, Azərbaycan musiqi tarixində Bethoven, Motsart, Bax səviyyəsində şəxsiyyət olub”.

Azərbaycan Bəstəkarlar İttifaqının katibi Eldar Mansurov isə Üzeyir Hacıbəylinin təməlini qoyduğu Azərbaycan klassik musiqisinin artıq öz dövrünü başa vurduğunu söyləyib: “Artıq XXI əsrdəyik. Azərbaycanda gənc musiqiçilər nəsli yetişir və onlar bu günün tələblərinə görə başqa musiqini - müasir musiqini bəyənir və müasir musiqinin yolu ilə gedirlər. Mənə elə gəlir ki, Azərbaycan musiqisində yeni era başlayır”. E. Mansurov bu ilin noyabrında Bəstəkarlar İttifaqının 75 illiyi münasibətilə Beynəlxalq Musiqi Festivalının keçiriləcəyini, festivalın proqramına Üzeyir Hacıbəylinin əsərlərinin də daxil ediləcəyini açıqlayıb: “Təkcə onun məzarının ziyarəti yetərli deyil. Gərək il boyu onun əsərləri səsləndirilsin, Üzeyir bəyimiz daim yad edilsin”.

Azərbaycan Dövlət Akademik Opera və Balet Teatrının solisti, xalq artisti Mənsum İbrahimov 18 sentyabrın bütün musiqiçilər tərəfindən bayram kimi qeyd olunduğunu vurğulayıb: “Musiqiçilərlə yanaşı, bütün Azərbaycan xalqını bu möhtəşəm gün münasibətilə təbrik edirəm. Üzeyir bəy biz musiqiçilərin mənəvi atasıdır. Neçə-neçə sənətkarlar, o cümlədən mən onun əsərləri ilə tanınmışıq, xalq tərəfindən qəbul olunub sevilmişik. Biz hər zaman ona borcluyuq. Bilirsiniz ki, Üzeyir bəyin öz övladı olmayıb, amma o Azərbaycana öz övladı kimi baxıb. Bu gün “Leyli və Məcnun” operasının yazılmasından 101 il keçir. Onun 22 yaşında yazdığı əsər bu gün də çox aktualdır və bütün dünya tərəfindən qəbul olunur”.

üzeyir_hacıbəyli