Mədəniyyət siyasəti

Ana səhifə

Mədəniyyət siyasəti

XI “Şərq-Qərb” Bakı Beynəlxalq Kino Festivalının təntənəli açılış mərasimi keçirilib - FOTOSESSİYA

XI “Şərq-Qərb” Bakı Beynəlxalq Kino Festivalının təntənəli açılış mərasimi keçirilib - <font color=red>FOTOSESSİYA</font>

18 sentyabr 2009 16:27 (UTC +04:00)

Bakı. Ülkər Qasımova – APA. Heydər Əliyev Sarayında XI “Şərq-Qərb” Bakı Beynəlxalq Kino Festivalının təntənəli açılış mərasimi keçirilib. APA-nın məlumatına görə, açılışda ilk olaraq Azərbaycanda səfərdə olan TÜRKSOY-un baş direktoru Düsen Kaseinov çıxış edib və festivalın işinə uğurlar arzulayıb. Mədəniyyət və turizm naziri Əbülfəs Qarayev isə festival münasibətilə kino işçilərini təbrik edib: “Artıq bu festival ənənə halını alıb və 11-ci dəfədir keçirilir. Bu festivala həm Azərbaycan, həm də digər ölkələr böyük əhəmiyyət verir. Festivalın adı da formata uyğundur. Bu gün Azərbaycan Şərqlə Qərbin qovuşuğundadır”. Bakı Musiqi Akademiyasının rektoru, xalq artisti Fərhad Bədəlbəyli bu festivalın Qarabağda keçirilməsini arzulayıb və qonaqları salamlayıb.

Azərbaycan Kinematoqrafçılar İttifaqının sədri, xalq yazıçısı Rüstəm İbrahimbəyov festivalı açıq elan edərək Bakıya təşrif buyurmuş çexiyalı rejissor Yan Sverakı səhnəyə dəvət edib. Qonaq Azərbaycanda olmasından və festivalda iştirakdan məmnunluq duyduğunu söyləyib.

Qeyd edək ki, sentyabrın 23-dək davam edəcək festival Azərbaycan Kinematoqrafçılar İttifaqı, Mədəniyyət və Turizm Nazirliyinin təşkilatçılığı, Heydər Əliyev Fondu, MDB və Baltik Ölkələri Kinematoqrafçılar İttifaqları Konfederasiyasının dəstəyi ilə keçirilir. Festival çərçivəsində Çexiya rejissoru Yan Sverakın “Sürmə” (1994), “Kolya” (1995) və “Netçciklər” (1998) filmlərinin retrospektivi təşkil olunacaq. Eyni zamanda festivalda digər çex rejissoru Zdenek Troşkanin “Ən gözəl tapmaca” film-nağılının Azərbaycan premyerası, Nana Djorcadzenin “Meteosəfeh” və Teymur İsmayılovun “Binqo” filmləri nümayiş olunacaq. Ənənəvi olaraq festivalda “Tamaşaçılara ən humanist göndəriş”, “Dünya kinematoqrafındakı xidmətlərinə görə”, “Qadınlıq rəmzini tərənnüm edən ən yaxşı rola görə”, “Kişilik rəmzini tərənnüm edən ən yaxşı rola görə”, “Ən parlaq debüt” nominasiyaları üzrə mükafatlar təqdim ediləcək.

Festival çərçivəsində “Avrasiya filmləri” panoramasında Macarıstan, Bolqarıstan, Rusiya, Gürcüstan, Qazaxıstan, Estoniya, Polşa, Çexiya, “Müsəlman ölkələri“ filmləri panoramasında isə Qazaxıstan, İran, Özbəkistan, Türkiyə, Misir, Mərakeş, Tunis və Azərbaycan filmlərinin nümayişi nəzərdə tutulur. Festivalda 42-ci Hyuston Festivalında xüsusi mükafata layiq görülən Elçin Musaoğlunun “Qırxıncı qapı” filmi göstəriləcək.

XI “Şərq-Qərb” Bakı Beynəlxalq Kino Festivalı çərçivəsində filmlərin nümayişi “Azərbaycan” kinoteatrı və “İbrus” Teatrında baş tutacaq.