Mədəniyyət siyasəti

Ana səhifə

Mədəniyyət siyasəti

Moskvada “Nikolay Konstantinoviç Baybakov. Yaradıcı insanın yolu” adlı sərgi keçirilib

01 mart 2011 16:17 (UTC +04:00)

Moskva. Fərid Əkbərov - APA. Moskvada “Nikolay Konstantinoviç Baybakov. Yaradıcı insanın yolu” adlı sərginin açılışı olub.

APA-nın Moskva müxbirinin verdiyi məlumata görə, martın 1-dən 20-nə kimi Rusiya Dövlət Mərkəzi Müasir Tarix Muzeyində keçiriləcək sərgi N.K.Baybakovun anadan olmasının 100 illiyinə həsr olunub.

Sərgidə Rusiya Dövlət Mərkəzi Müasir Tarix Muzeyinin, “LUKoyl” Açıq Səhmdar Cəmiyyəti muzeyinin fondlarından, habelə N.Baybakovun nəvəsi Mariya Baybakovanın şəxsi kolleksiyasından seçilmiş nadir materiallar nümayiş etdirilib. Nümayiş olunan materiallar sovet neft sənayesinin qurulmasında və inkişafında böyük xidmətləri olmuş görkəmli mütəxəssisin və dövlət xadiminin həyat yolundan bəhs edir. Sərgidə dövlət xadiminin Azərbaycanla bağlı xatirələrini əks etdirən eksponatlar içərisində N.K.Baybakova verilən “İstiqlal” ordeni, onun Heydər Əliyevlə birgə fotoları, xatirə hədiyyələri və Azərbaycan haqqında kitabları yer alıb.

Qeyd edək ki, N.K.Baybakov fəaliyyətə Bakı neft mədənlərində mühəndislikdən başlayıb. Daha sonra SSRİ neft sənayesi naziri və SSRİ Dövlət Plan Komitəsinin sədri vəzifəsində çalışıb.

“Babamı Azərbaycanla çox şey bağlayır. Hər şeydən əvvəl Azərbaycan onun vətəni idi”. Bunu jurnalistlərə açıqlamasında N.K.Baybakovun nəvəsi Mariya Baybakova bildirib. Onun sözlərinə görə, babasının Heydər Əliyevlə möhkəm dostluğu olub: “Bu dostluq Sovet İttifaqı dağılandan sonra da davam edib”. M.Baybakova babasının Balaxanıda doğulduğunu, ali təhsilini Bakıda aldığını söyləyib: “Babam həmişə öz vətəninə sərhədsiz sevgi bəsləyib”.

Sərginin açılış mərasimində Azərbaycanın Rusiyadakı səfiri Polad Bülbüloğlu da iştirak edib. Səfir məşhur azərbaycanlı N.Baybakovun Azərbaycan və sovet neft sənayesinin inkişafında göstərdiyi xidmətlərdən danışıb.