Mədəniyyət siyasəti

Ana səhifə

Mədəniyyət siyasəti

Mədəniyyət və turizm naziri Əbülfəs Qarayev Ümumdünya Turizm Təşkilatının baş qərargahında bir sıra ikitərəfli görüşlər keçirib

29 mart 2011 08:32 (UTC +04:00)

Bakı. Ülkər Qasımova-APA. 2011-ci il Azərbaycanda Turizm İli elan edilməsi ilə bağlı mədəniyyət və turizm naziri Əbülfəs Qarayev Ümumdünya Turizm Təşkilatının (ÜTT) baş qərargahında təşkil olunmuş ikitərəfli görüşlərdə iştirak edib.
Mədəniyyət və Turizm Nazirliyindən APA-ya verilən məlumata görə, iclasda nazir 7-9 aprel tarixlərində Bakı şəhərində keçiriləcək Ümumdünya Mədəniyyətlərarası Dialoq Forumu, Forumda iştirakı təsdiq olunmuş yüksək vəzifəli şəxslər haqqında məlumat verib və ÜTT-nın əməkdaşlarını bu mühüm tədbirdə iştirak etmək üçün dəvət edib.
ÜTT-nın əməkdaşı BMT-nin Ümumdünya Turizm Təşkilatının İcraiyyə Şurasının növbəti sessiyası haqqında məlumat verərək, İcraiyyə Şurasının üzvü olmaq üçün Avropa regionundan namizədliklərin təqdim edildiyi və Azərbaycanın arzu edəcəyi təqdirdə də namizədliklə bağlı müraciət edə biləcəyini bildirib.
ÜTT-nın Avropa üzrə Regional direktor müavini xanım Kodrula Vohlmuther turizmin və turizm məhsulu istehsalının inkişafına töhvə verə biləcək Xəzər Dənizi Regionunda Kruiz Turizminin inkişaf etdirilməsi təşəbbüsü ilə çıxış edib. Müəyyən məlum problemlərin olmasına baxmayaraq, nazir Xəzər Dənizi Turizminin İnkişafı Layihəsinə tam olaraq dəstək verdiyini bildirib. Müzakirələr zamanı BMT-nin ÜTT tərəfindən regional əməkdaşlıq imkanlarının araşdırılması məqsədilə Azərbaycana təşkilat tərəfindən yüksək səviyyəli peşəkarların göndərilməsi təklif olunub.
Əbülfəs Qarayev beynəlxalq səviyyədə Azərbaycanın Dağlıq Qarabağ problemi haqqında məlumat verib, bəzi sərgilərdə Azərbaycan ərazisinin Ermənistanın tərkib hissəsi kimi təqdim edilməsinin yolverilməz olduğunu bildirib. BMT tərəfindən Azərbaycanın ərazi bütövlüyü ilə bağlı 4 qətnamənin qəbul olunduğu diqqətə çatdırılıb, Dağlıq Qarabağ regionunun beynəlxalq sərgilərdə iştirakı ilə bağlı nəzarətin gücləndirilməsi məqsədilə BMT qətnamələrinin həyata keçirilməsində ÜTT-nin dəstəyinə ehtiyac olduğu bildirilib. Görüşlərdə nazir Avstriya ilə birgə əməkdaşlıq nəticəsində Şahdağ Qış-Yay Turizm Kompleksinin xüsusi marketinq planının hazırlanması və maraqlı olduqları təqdirdə BMT ÜTT-nin layihənin hazırlanmasına cəlb olunmaq imkanının olduğunu bildirib. ÜTT-nin əməkdaşı xanım Alla Peressolova İpək Yolu tədbirlərindən söhbət açaraq, cənab naziri cari ilin noyabr ayında Londonda keçiriləcək 5-ci nazirlər sammitinə dəvət edib.
Görüş zamanı ÜTT-nin Rəqabət, Xarici Əlaqələr və Əməkdaşlıq üzrə icraçı direktoru cənab Marcio Favilla ilə naziri Əbülfəs Qarayev arasında Statistika potensialının artırılması üçün seminarların keçirilməsi proqramı (SPAP) (2011-2012) üzrə Anlaşma Memorandumu imzalanıb. Cənab Favilla 2011-ci ildə BMT ÜTT-nin könüllü üzvləri olmaq üçün Azərbaycandan iki namizədin: Azərbaycan Turizm Assosiyası və Bakı Turizm İnformasiya Mərkəzinin namizədliklərinin təqdim olunduğunu qeyd edib. Bu namizədlər cari ilin iyun ayında Keniyanın Mombasa şəhərində keçiriləcək iclasda İcraiyyə Şurasına təqdim olunacaqlar və sözügedən Şura öz növbəsində bu barədə müvafiq rəylərini Koreya Respublikasında Baş Assambleyaya təqdim edəcək. İclasın sonunda 2011-ci ilin ölkə prezidenti tərəfindən Turizm İli elan olunduğunu nəzərə alaraq, nazir ölkə başçısı İlham Əliyevin İspaniya Krallığına rəsmi səfərinin və səfər zamanı BMT-nin Ümumdünya Turizm Təşkilatının Baş Qərargahına ziyarətin təşkil olunmasını təklif edib.