Mədəniyyət siyasəti

Ana səhifə

Mədəniyyət siyasəti

Bakıda “Silahlı münaqişələr zamanı mədəni sərvətlərin qorunması”na həsr olunmuş beynəlxalq təlim keçirilir

13 iyun 2011 09:54 (UTC +04:00)

Bakı. Ülkər Qasımova – APA. Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində “Silahlı münaqişələr zamanı mədəni sərvətlərin qorunması”na həsr olunmuş beynəlxalq təlim keçirilir. APA-nın məlumatına görə, təlim Mədəniyyət və Turizm Nazirliyi, Beynəlxalq Qızıl Xaç Komitəsinin (BQXK) Azərbaycan Nümayəndəliyi və İCOM Azərbaycan Milli Komitəsinin birgə təşəbbüsü ilə təşkil olunub.

Tədbirdə çıxış edən Mədəniyyət və Turizm Nazirliyinin nümayəndəsi Fikrət Babayev bildirib ki, silahlı münaqişələr nəticəsində ən çox zərər çəkən mədəni irsdir: “Məsələnin ciddiliyini və əhəmiyyətini nəzərə alan beynəlxalq birlik 1954-cü ildə “Silahlı münaqişə zamanı mədəni sərvətlərin qorunması haqqında” Haaqa Konvensiyasını qəbul edib. Həmin konvensiyanın icra mexanizmi kimi işğal zamanı mədəni sərvətlərin qorunmasına dair Protokol da qəbul edilib. Lakin problemin həlli istiqamətində yaranan boşluqlar 1999-cu ildə Haaqa Konvensiyasına dair ikinci protokolun qəbul edilməsi üçün zəmin yaratdı”.

BXQK-nin Azərbaycan nümayəndəliyinin başçısı Şerin Pollini isə “Rəqabət aparan prioritetlər: Mədəni sərvətlərin humanitar qanunlar əsasında qorunması və BQXK-nın Azərbaycanda fəaliyyəti” mövzusunda çıxış edib. Onun fikrincə, münaqişələr zamanı mədəni sərvətlərin qorunması üçün səmərəli sistemin yaradılması düşünülməlidir.

BQXK-nin Hüquqi qaydalar üzrə regional məsləhətçisi Maria Teresa Dutli “Silahlı münqaişə zamanı mədəni sərvətlərin qorunması qaydaları və 1954-cü il Haaqa Konvensiyasının İkinci Protokolunun əhəmiyyəti” mövzusunda geniş məlumat verib.

Xalça muzeyinin direktoru və İCOM Azərbaycan Milli Komitəsinin sədri Röya Tağıyeva isə “Haaqa Konvensiyası və Azərbaycanda onun həyata keçirilməsi shaəsində görülən işlər” barəsində çıxış edib.