Mədəniyyət siyasəti

Mədəniyyət siyasəti

Fərhad Bədəlbəyli: “90 yaşlı akademiyaya rəhbərlik etmək sözsüz ki, çətindir”

22 iyun 2011 15:01 (UTC +04:00)

Bakı. Ülkər Qasımova – APA. “Əminəm ki, Azərbaycan “Eurovision”a ev sahibliyi ilə Avropanı təəccübləndirəcək. Biz bu müsabiqəyə yüksək səviyyədə ev sahibliyi edəcəyik. Çünki biz qonaqları qəbul edib heyrətləndirməyi bacarırıq. Eyni zamanda bu məsələ bilavasitə dövlət başçısının və birinci xanım Mehriban Əliyevanın diqqət mərkəzindədir”. Bu sözləri APA-ya açıqlamasında Üzeyir Hacıbəyli adına Bakı Musiqi Akademiyasının rektoru, xalq artisti Fərhad Bədəlbəyli deyib.

Azərbaycanın bundan sonra birincilik uğrunda bu qədər mübarizə aparmayacağını deyən F. Bədəlbəyli, ardıcıl 2 il qələbənin də qeyri-mümkün olduğunu söyləyib: “Biz gələn il birinci yeri tutmayacağıq, çünki tarixdə belə bir şey olmayıb ki, kimsə iki il sərasər birincilik qazansın. Sözsüz, çox böyük bir hadisədir. Əslində hər zaman demişəm, bu müsabiqənin bədii səviyyəsi məni qane etmir. Ancaq təbliğat məsələsində bu müsabiqə güclü vasitədir. Bu baxımdan “Eurovision”un əhəmiyyəti çox böyükdür”.

Rektor gələn il təmsilçimizin milli əhval-ruhiyyədə mahnı ifa etməsinin vacibliyini vurğulayıb: “Artıq “mütləq birinci olmalıyıq” kimi fikirlər geridə qalıb. İndi milli ruh çərçivəsində bir şey etmək lazımdır. Şəxsən mənim üçün bu dörd illik təmsilçiliyimiz dövründə ən yaxşı ifa birinci il olub. Azərbaycan mədəniyyəti, qonaqpərvərliyi ilə Avropanı təəccübləndirəcəyik”.

F. Bədəlbəyli rəhbərlik etdiyi təhsil ocağının fəaliyyətinin 90 illik yubiley tədbirləri barədə də danışıb. O bildirib ki, il ərzində ölkədə və xaricdə keçirilən bütün konsertlər məhz yubileylə əlaqədar olub: “İstər mənim konsertlərim, istərsə də Murad Hüseynov, Murad Adıgözəlzadə, Yalçın Adıgözəlovun çıxışları məhz yubileyə həsr edilib. Eyni zamanda bütün afişaların yuxarısında “BMA – 90” qeyd olunub. Biz belə qərar vermişik ki, kim konsert keçirsə, kitab nəşr etdirsə, həmçinin tədbir keçirilsə mütləq 90 illiyə həsr olunsun”.

“90 yaşlı akademiyaya rəhbərlik etmək sözsüz ki, çətindir”, deyən F. Bədəlbəyli, BMA-da tanınmış ulduzların işlədiyini və ulduzlarla çalışmağın çox çətin olduğunu qeyd edib.