Mədəniyyət siyasəti

Ana səhifə

Mədəniyyət siyasəti

“Eurovision-2012" mahnı müsabiqəsində Azərbaycanı təmsil etmək üçün 72 nəfər milli seçim turunda iştirak hüququ qazanıb

18 noyabr 2011 14:18 (UTC +04:00)

Bakı. Ülkər Qasımova-APA. Azərbaycanı “Eurovision-2012" mahnı müsabiqəsində təmsil etmək üçün qeydə alınan 119 nəfərdən 72-si milli seçim turunda iştirak hüququ qazanıb. Bu gün İctimai Televiziyada ilkin dinləmələrdən keçən 72 nəfərlə görüş keçirilib və hər bir iştirakçının çıxış edəcəyi həftəni müəyyənləşdirmək məqsədilə püşkatma olub. İctimai Televiziyanın ictimaiyyətlə əlaqələr və monitorinq şöbəsindən APA-ya verilən məlumata görə, 72 iştirakçı hər biri 9 nəfərdən ibarət 8 qrupa bölünüb. İştirakçılar 8 həftə ərzində İctimai Televiziyanın canlı efirində çıxış edəcəklər.

Milli seçim şousu həftə ərzində 5 gün axşam saat 21:00-da yayımlanacaq. İştirakçılar həftə içi hər gün səs imkanları və səhnə performanslarını nümayiş etdirəcəklər. Göndərilən SMS və münsiflər heyətinin səsverməsi nəticəsində hər həftənin qalibi müəyyən olunacaq. 8 həftənin qalibi yarımfinala vəsiqə qazanacaq. Finala keçmiş 3 nəfər iştirakçı isə Azərbaycanı "Eurovision Mahnı Müsabiqəsi 2012"də təmsil etmək uğrunda yarışacaq.

Qeyd edək ki, milli seçim turunda digər ölkə vətəndaşı olan 3 nəfər də iştirak hüququ qazanıb. Onların 3-ü də ABŞ vətəndaşlarıdır. Əcnəbi iştirakçılardan biri solo, digər ikisi duet şəklində çıxış edir.

Xatırladaq ki, "Eurovision -2012” mahnı müsabiqəsi 22, 24 və 26 may tarixlərində keçiriləcək