Mədəniyyət siyasəti

Ana səhifə

Mədəniyyət siyasəti

Azərbaycan Mədəniyyət və Turizm Nazirliyi UNESCO-ya rəsmi müraciət ünvanlayıb

28 noyabr 2011 08:14 (UTC +04:00)

Bakı. Ülkər Qasımova – APA. Azərbaycan Mədəniyyət və Turizm Nazirliyi UNESCO-ya rəsmi müraciət ünvanlayıb. Nazirliyin Beynəlxalq Əlaqələr və Mədəniyyət Proqramları şöbəsindən APA-ya verilən məlumata görə, etiraz ermənilərin Azərbaycan aşıq sənətinə iddia etmələri ilə bağlı olub. Mədəniyyət və turizm naziri Əbülfəs Qarayev tərəfindən ötən ay UNESCO Katibliyinə ünvanlanan məktubda Ermənistanın təqdim etdiyi sənədlərdə erməni tərəfinin Azərbaycanın mədəni irsinə qarşı saxta fəaliyyəti və nominasıyaların qeyri-maddi mədəni irsin qorunması üzrə Konvensiyanın şərtlərinə uyğun olmaması bildirilib. Müraciətdə 2009-cu ildə Azərbaycan Aşıq sənətinin UNESCO-nun qeyri-maddi mədəni irs üzrə Reprezentativ siyahısına daxil edildiyi xatırlanıb, aşıq sənətinin Azərbaycan xalqının zəngin mədəni irsinin bir nümunəsi olduğu göstərilib. UNESCO tərəfindən bu münasibətə cavab olaraq bildirilib ki, Katiblik bu problemli məsələdən məlumatlıdır və Azərbaycan Komitənin üzvü kimi bu məsələləri iclasda bir daha qaldıra və komitənin qərarına belə halların qəbul edilməzliyi barədə müvafiq maddənin və ya əlavənin qəbul edilməsini təklif edə bilər.
Qeyd olunub ki, Mədəniyyət və Turizm Nazirliyi, Xarici İşlər Nazirliyi və UNESCO yanında Daimi Nümayəndəliyin birgə fəaliyyəti nəticəsində təqdim edilmiş sənədlər öncədən də UNESCO-nun Qeyri-maddi mədəni irsin qorunması üzrə Hökumətlərarası Ekspert Komitəsinin müsbət rəyini ala bilməyib. Beləliklə, Aşıq sevgi romansı və Vardavar faylı carı ilin 20 noyabr-1 dekabr tarixlərində İndoneziyanın Bali adasında keçirilən UNESCO-nun Qeyri-maddi mədəni irsin qorunması üzrə Hökumətlərarası Komitənin növbəti 6-cı sessiyasında Mədəniyyət və Turizm Nazirliyi və digər aidiyyəti qurumların önləyici tədbirləri nəticəsində qəbul edilməyib. Bütün bu hadisələr Ermənistanın saxtakarlıq fəaliyyətinin dünya ictimaiyyəti tərəfindən öz layiqli cavabını almasının bir daha bariz nümunəsidir.

Xatırladaq ki, 20 noyabr -1 dekabr tarixlərində İndoneziyanın Bali adasında keçirilən UNESCO-nun Qeyri-maddi mədəni irsin qorunması üzrə Hökumətlərarası Komitənin növbəti 6-cı sessiyasında Ermənistan tərəfindən təqdim olunan iki nominasiya – “Erməni Aşıq sevgi romansı ənənəsi” və “Erməni su festivalı Vardavar” adlı fayllar da müzakirə edilən nominasiyalar arasında olub. Müzakirə zamanı Ermənistanın təqdim etdiyi nominasiyaların Konvensiyanın müvafiq meyarlarına cavab vermədiyi ilə yanaşı, aşıq sənətinin Ermənistan tərəfindən mənimsəndiyi və nominasiyada Dağlıq Qarabağla bağlı təxribat xarakterli istinadların olduğunu Komitənin üzvlərinə çatdırılıb. Qeyd edilənlərin Konvensiyanın müvafiq müddəalarına zidd olduğu və UNESCO-nun əsas prioritetlərindən olan mədəniyyətlərarası dialoqa və qarşılıqlı anlaşmaya töhfə vermədiyi vurğulanıb. Ermənistan nümayəndəsinin izahatlarına baxmayaraq, Komitənin əksər üzvləri Azərbaycanın ədalətli mövqeyini dəstəkləyərək Ermənistanın iki nominasiyasının qeyri-maddi mədəni irs üzrə təcili qorunma siyahısına daxil edilməsinin əleyhinə çıxış ediblər.

Sözügedən iclasda Azərbaycanı UNESCO yanında Daimi Nümayəndəliyin birinci katibi Anar Kərimov, Mədəniyyət və Turizm Nazirliyinin əməkdaşı Günay Əliyeva və müstəqil ekspert-musiqişünas Sənubər Bağırova təmsil ediblər.

UNESCO _ Azərbaycan