Mədəniyyət siyasəti

Ana səhifə

Mədəniyyət siyasəti

Ələkbər Hüseynovun anadan olmasının 50 illiyi ilə əlaqədar anım tədbiri keçirilib – FOTOSESSİYA

Ələkbər Hüseynovun anadan olmasının 50 illiyi ilə əlaqədar anım tədbiri keçirilib – <font color=red>FOTOSESSİYA </font>

14 dekabr 2011 15:36 (UTC +04:00)

Bakı. Ülkər Qasımova – APA. Abdulla Şaiq adına Azərbaycan Dövlət Kukla Teatrında mərhum aktyor, uşaqların sevimlisi Ələkbər əminin (Hüseynov) anadan olmasının 50 illiyi ilə əlaqədar anım tədbiri keçirilib. APA-nın məlumatına görə, anım mərasimi Ələkbər Hüseynovun ifasının yer aldığı lent yazısı ilə başlayıb. Tamaşaçılar mərhum aktyorun xatirəsini ayaq üstdə yad ediblər.

Tədbirdə Ə. Hüseynovun keçdiyi həyat və sənət yolundan söhbət açılıb. Ə. Hüseynovun yaxın dostu, aktyor Ayşad Məmmədov onunla bağlı xatirələrini bölüşüb: “Bu gün Ələkbərin işığına toplaşmışıq. Çox təəssüf edirəm ki, onu çox tez itirdik. Onunla Şəki Teatrında birgə çalışımışıq və hər bazar günümüzü Şəkidə bir məkanda keçirirdik. O məkanda tənhalığa qapılıb, xəyallara dalırdıq. Bu gün mən Ələkbər üçün səməni cücərdib qəbri üstə aparacağam, bunu yaşadığım dövr ərzində edəcəyəm. Amma bir gün mən də olmayacağam və Ələkbər narahat olmasın, mən olmayanda başqa kimsə o səmənini onun üçün də, mənim üçün də cücərdəcək”. Ayşad Məmmədov Ələkbər Hüseynovla bağlı xatirələrini bölüşərkən göz yaşlarına hakim ola bilməyib.

Bir çox tamaşalara Ələkbər Hüseynovla birlikdə çəkilən Azərbaycanın xalq artisti Afaq Bəşirqızı da mərhumla bağlı xatirələrini bölüüşüb və onun şərəfli ömür yaşadığını bəyan edib. Aktyorun oğlu Cavidan Hüseynzadə isə atasız yaşamağın çətinliyindən danışıb: “Artıq neçə müddətdir ki, biz atasız, Azərbaycan uşaqları isə Ələkbər əmisiz qalıb. Onsuz yaşamaq çox çətindir. Bizim heç birimiz onun uşaqlara bəxş etdiyi sevinci verə bilmərik. Heç buna çalışmaq da lazım deyil, çünki Ələkbər əmi bir dənə olub və belə də qalacaq”.

Anım tədbirində Ələkbər Hüseynovun oynadığı tamaşalardan fraqmentlər də nümayiş etdirilib.