Mədəniyyət siyasəti

Ana səhifə

Mədəniyyət siyasəti

Emin Ağalarov: “Bakıda və bu məkanda çıxış etmək istər mənim, istər musiqiçilərim üçün çox böyük məsuliyyətdir”

22 dekabr 2011 23:01 (UTC +04:00)

Bakı. Ülkər Qasımova – APA. “Azərbaycanda və bu məkanda çıxış etmək istər mənim, istər musiqiçilərim üçün çox böyük məsuliyyətdir. Bakıda, sizin qarşınızda çıxış etmək bütün konsertlərdən daha fərqli və istidir. Heç bir ölkədə çıxışım zamanı bu hissləri keçirmirəm. Bütün il boyu həsrətlə Bakıdakı konsertimizi gözləyirik”. APA-nın məlumatına görə, bu sözləri dekabrın 22-də Heydər Əliyev Sarayında “Emin Live” adlı konsertlə çıxış edən məşhur müğənni və bəstəkar Emin Ağalarov deyib.

Anşlaqla baş tutan konsertdə bir çox yaddaqalan məqamlar da yaşanıb. Konsert üçün saray səhnəsində xüsusi böyük ölçülü 6 ekran quraşdırılıb. Səhnənin quraşdırılması üç gün müddətində hazırlıq nəticəsində başa gəlib və dekorasiyada müxtəlif rənglərdən istifadə olunub.

Emin Ağalarov Azərbaycan tamaşaçısını salamlayıb, bu səhnədə çıxış etməyin onun üçün çox xoş olduğunu bildirib. Emin konsertin ilk dəqiqələrindən zalı ələ almağı bacarıb. Müğənninin hər ifası alqışlarla və “bravo” sədaları ilə müşayiət olunub. Müğənni konsertdə iştirak edən hər bir tamaşaçıya xüsusi diqqət ayırıb. Ona yaxınlaşıb gül dəstəsi verən və avtoqraf istəyənlərin hər birini hörmətlə yanaşıb.

İfaçını səhnədə altı musiqiçi və üç bek-vokal müşayiət edib. İki saata yaxın davam edən konsertdə müğənni, hər proqramında olduğu kimi SSRİ xalq artisti, Azərbaycanın unudulmaz müğənnisi, eyni zamanda ailəsinin yaxın dostu Müslüm Maqomayevi də xatırlayıb. Səhnədə qurulmuş böyük ekranda “Bremen musiqiçiləri” cizgi filmində böyük sənətkarın ifa etdiyi Trubadorun mahnısını ifa edib. Müğənni pərəstiş etdiyi və özünə sənət müəllimi hesab etdiyi görkəmli müğənni ilə öz xəyallarında duet də oxuyub. Müslüm Maqomayev ekranda, Emin Ağalarov isə səhnədə “Sinyaya vecnost” mahnısını ifa edib. Tamaşaçılar Müslüm Maqomayevin əvəzolunmaz ifasını ayaqüstə alqışlayıblar. Emin Ağalarov isə elə səhnədən tamaşaçı zalında əyləşən və oğlunu izləyən atası Araz Ağalarova Müslüm Maqomayevlə dostluğu yolunda etdiklərinə görə təşəkkürünü bildirib. Müğənni Moskvada Müslüm Maqomayev adına çox böyük bir konsert zalının, uca abidəsinin və parkın olduğunu vurğulayıb.
Emin Ağalarov Azərbaycanın dövlət başçısı İlham Əliyevi qarşıdan gələn 50 illik yubileyi münasibəti ilə təbrik edib və ona xoş arzularını bildirib.

O, səhnədən atası Araz Ağalarova, həyat yoldaşı Leyla Əliyevaya, nənəsinə təşəkkürünü bildirib. Emin nənəsinin yanına gedərək onu qucaqlayıb, onun 97 yaşında olduğunu deyib.

Konsertdə müğənni əsasən “Wonder” albomundakı mahnıları səsləndirib. O, “Just for one night”, “Wonder”, “All i need to night”, “Miss America”, “Falling”, “Obvious”, “Dont go” mahnıları ilə yanaşı, bir neçə yeni mahnı da ifa edib.

Konsertdə “Eurovision-2011” mahnı müsabiqəsində Azərbaycana qalibiyyət qazandıran Eldar Qasımov və Nigar Camal da çıxış edib. Qalibləri səhnəyə Emin özü dəvət edib və Azərbaycanın bu müsabiqədə qələbəsindən bir daha sevincini dilə gətirib. Eldar və Nigar isə elə Düseeldorf səhnəsində olduğu kimi Heydər Əliyev Sarayında da “Running Scared” duetini səsləndiriblər. Qalib duet ifaçıları tamaşaçıların diqqətini Eminin konsertindən gələn gəlirin Nardaranda yerləşən 130 saylı məktəbin təmir işlərinin yekunlaşdırılmasına sərf olunacağını çatdırıblar. Səhnədəki ekranlarda həmin məktəb nümayiş etdirilib və bildirilib ki, digər iki konsertdən əldə olunan gəlir bu məktəbin bərpasına istifadə olunub.

Emin tamaşaçıların alqışları ilə üç dəfə səhnəyə qayıdıb və yenidən mahnılar ifa edib. Müğənni bu konsertində də Ruh filmindən hər kəsin sevdiyi “Unchained melody” mahnısını ifa edib və həyat yoldaşı Leyla Əliyevanın yanına gələrək ona bir qırmızı qızılgül verib. O, Azərbaycan xalqını qarşıdan gələn 31 dekabr Dünya Azərbaycanlılarının Həmrəylik Günü və Yeni il bayramı münasibəti ilə təbrik etməyi unutmayıb.

Konsertdən sonra isə Emin əlil və kimsəsiz uşaqlarla, eyni zamanda “fan-klub”u ilə görüşüb. Onlara avtoqraf verib, foto çəkdirib. Konsertə gələn hər bir tamaşaçıya da müğənninin “Wonder” albomu və remix variantı hədiyyə edilib.