Mədəniyyət siyasəti

Ana səhifə

Mədəniyyət siyasəti

Ermənistan mətbuatı bir sıra ölkələrin Azərbaycanda keçiriləcək “Eurovision-2012”-də iştirakdan imtina etməsi barədə yalan məlumatlar yayır

11 yanvar 2012 13:14 (UTC +04:00)

Bakıda keçiriləcək 57-ci Eurovision müsabiqəsində iştirak edəcək ölkələrin tam siyahısı yanvarın sonunda məlum olacaq

Bakı. Ülkər Rəşidqızı-APA. İslandiya Azərbaycanın ev sahibliyi edəcəyi “Eurovision-2012” mahnı müsabiqəsi üçün təmsilçisinin seçimini həyata keçirir. APA-nın xəbərinə görə, hazırda bu ölkədə milli seçimlər aparılır.

Ölkənin namizədinin seçilməsi üzrə milli seçimin (Söngvakeppni Sjonvarpsins) ilk yarımfinalının iştirakçıların sıra sayı da artıq bəlli olub. «Söngvakeppni Sjonvarpsins» müsabiqəsi üç yarımfinaldan ibarətdir. Yarımfinallar yanvarın 14, 21 və 28-də keçiriləcək. İslandiyanın milli finalı isə fevralın 11-də baş tutacaq. Yarımfinallarda 15 namizəd iştirak edəcək və ilk iki yeri tutan ifaçılar finala adlayacaqlar. Səslər isə münsiflər heyəti və tamaşaçıların rəyi əsasında müəyyən olunacaq.

Almaniya da “Eurovision-2012” mahnı müsabiqəsində təmsilçi seçiminə uzun müddətdir start verib. Hətta bu məqsədlə ötən ilin sentyabrında Köln şəhərində “The Unser Star für Baku” adı altında seçim turunun ilk mərhələsini keçirilib. Almaniyanın milli seçim prosesi "Brainpool" şirkətinin təşkilatçılığı ilə keçirilir. Münsiflər heyətinə Almaniyanın ən məşhur estrada artistlərindən olan Dürr Tomas rəhbərlik edir.

İsveçin Bakı səhnəsində təmsilçisi ənənəyə uyğun olaraq “Melodifestival” vasitəsi ilə seçilir. Ötən ildən müsabiqə üçün iştirakçı seçiminə başlayan İsveç artıq 16 namizədini təyin edib. Növbəti ay isə İsveç təmsilçisinin adı müəyyənləşəcək. Bu il İsveçdən müsabiqədə iştirak üçün 3485 mahnı təklif olunub. Daha sonra seçiləcək 570 mahnı ölkənin milli televiziyasının rəsmi saytında keçiriləcək səsvermədə iştirak hüququ qazanacaq. “Melodifestival” müsabiqəsinin finalında 32 mahnı birincilik uğrunda mübarizə aparacaq. Final mərasimi peşəkar münsiflər heyəti və tamaşaçıların birgə səsverməsi ilə həyata keçiriləcək.

Danimarkada isə ölkəni “Eurovision-2012” mahnı müsabiqəsində təmsil etmək uğrunda mübarizə aparacaq finalçılar artıq müəyyənləşib. Finala 7 namizəd keçib. Danimarkanın milli seçimlərində münsiflər kürsüsündə azərbaycanlı da olub. Danimarkanın “Eurovision” müsabiqəsində təmsilçisini müəyyənləşdirmək üçün ənənəvi olaraq Dansk Melodi Grand Prix festival keçirilir. Bu il ölkənin milli finalı Olborq şəhərində keçiriləcək. Ölkənin təmsilçisinin adı isə yanvarın 21-də bəlli olacaq.

Belçika isə artıq təmsilçisini seçib. Bakıda keçiriləcək “Eurovision-2012” mahnı müsabiqəsində Belçikanın milli yayımçısı olan EEN telekanalı təmsilçinin adını açıqlayıb. Belçikanı 57-ci “Eurovision” mahnı müsabiqəsində 16 yaşlı Laura van den Bruel (İris) təmsil edəcək.

Onu da vurğulayaq ki, Ermənistan mətbuatında adı çəkilən ölkələrin “Eurovision -2012”də sözügedən ölkələrin təmsil olunmayacağı barədə yanlış informasiyalar yer alıb. Ölkələrdə aparılan təmsilçi seçimləri və hazırlıqlar isə yazılanların tam əksini göstərir.

Qeyd edək ki, ənənəyə uyğun olaraq bu il də Azərbaycanda keçiriləcək müsabiqədə neçə ölkənin təmsil olunacağı ilə bağlı siyahı Avropa Yayımları Birliyi tərəfindən təsdiqlənəcək və daha sonra ictimaiyyətə məlumat veriləcək. Bu siyahı isə hər il olduğu kimi yanvarın sonunda açıqlanacaq.