Media

Ana səhifə

Media

Qulu Məhərrəmli: “Mənə AzTV kanalında bir sıra rəhbər vəzifələr təklif ediblər”

06 aprel 2007 14:15 (UTC +04:00)

APA-nın məlumatına görə, bu açıqlamanı jurnalistlərə “Azərbaycan Televiziya və Radio Verilişləri” Qapalı Səhmdar Cəmiyyətinin “Səhər” proqramının keçmiş rəhbəri Qulu Məhərrəmli verib. Hazırda fəaliyyətini icmalçı kimi davam etdirəcəyini deyən Q. Məhərrəmli publisist verilişlər, tok-şoular hazırlayacağını qeyd edib. “Səhər” proqramının bundan sonrakı fəaliyyətinə gəldikdə, o, proqramın işinə müdaxilə etmək səlahiyyətinin olmadığını deyib: “Mən bu proqramının yaradılmasında iştirak etmişəm, birinci verilişini də özüm aparmışam. 12 ildir ki, bu proqrama rəhbərlik edirəm. Bir insanın uzun müddət bir proqramda olması çox hallarda təkrarlara gətirib çıxarır. Bu baxımdan görünür, verilişə yeni dəst-xəttin gəlməsinə ehtiyac yaranıb. Düzdür, bundan sonra proqramın işinə müdaxilə edə bilmərəm. Amma görsəm ki, orada müəyyən əndazədən çıxma halları var, əvvəlki prinsiplərə uyğun olmayan veriliş hazırlanır, o zaman yoldaşlıq tövsiyəsi verə bilərəm. Mən artıq o proqram üçün heç bir məsuliyyət daşımıram”. Qulu Məhərrəmli hələlik başqa telekanallardan dəvət almadığını bildirib: “Hələlik belə təklif yoxdur. Gələcəkdə kimsə dəvət edərsə, bu barədə düşünmək olar. Hazırkı vəziyyət mətbuatda yazıldığı kimi faciəli deyil. AzTV-də mənə qarşı münasibət yaxşıdır, sadəcə, bir vəzifədən digərinə keçmişəm”. /APA/