Bakı. Ülkər Rəşidqızı – APA. Bu gün Azərbaycan Yazıçılar Birliyinin (AYB) “Natəvan” klubunda yazıçı-publisist Günel Anarqızının “Qarabağ hekayələri” adlı audio-kitabının təqdimatı keçirilib. APA-nın məlumatına görə, “Qarabağ hekayələri” adlı audio-kitabda hekayələr xalq artistləri Fəxrəddin Manafov, Şükufə Yusupova, Yalçın Adıgözəlov, əməkdar artist Mehriban Zəki, aparıcılar Nərgiz Cəlilova və Emin Musəvi tərəfindən səsləndirilib. Hekayələr toplusunda əməkdar artist Emil Əfrasiyab və pianoçu Nizami Əliyevin bəstə və ifaları yer alıb.
Tədbirdə çıxış edən xalq yazıçısı Çingiz Abdullayev bildirib ki, audio-kitab halında belə bir diskin hazırlanması yüksək qiymətləndirilməlidir. Onun sözlərinə görə, audio halında kitabın olması gənclər üçün çox əlverişli olacaq. Yazıçı-publisist Günel Anarqızı deyib ki, əslində bu hekayələr çoxdan yazılıb: “2002-2006-cı illərdə qələmə aldığım hekayələrim burada əks edilib. Artıq kitab halında bir neçə dəfə çap olunub. Ancaq audio-kitab formatında ilk dəfədir. Layihədə bir çox tanınmış simalarımız iştirak edib. Onlara da öz təşəkkürümü çatdırıram. Düşünürəm ki, ictimaiyyətimiz üçün olduqca maraqlı layihə olacaq. İnanıram ki, hamı tərəfindən çox seviləcək”.
İki dildə hazırlanan audio-kitaba yazıçının 2002-2006-cı illər arasında qələmə aldığı “Ataya”, “Şuşam”, “Ağac”, “Qadın üzlü şəhər”, “Arzu” və “Keçmişə sarı” hekayələri daxildir. Təqdimat mərasimində AYB-nin sədri, xalq yazıçısı Anar, xalq şairi Fikrət Qoca, AYB-nin gənclər üzrə katibi Rəşad Məcid və başqaları iştirak edib.
Qeyd edək ki, “Qarabağ hekayələri” yazıçının sayca ikinci audio-kitabıdır. Kitab “Bank Standart”ın maliyyə dəstəyi ilə ərsəyə gəlib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
