Bakı. Kəmalə Quliyeva – APA. “Azərbaycanda Hepatit C virusuna yoluxmuş insanların dəqiq sayı bəlli deyil. Yalnız o məlumdur ki, İİV-lə yaşayan insanların 62,4 faizində Hepatit C mövcuddur”. APA-nın xəbərinə görə, bunu Azərbaycanda BMT-nin İİV, QİÇS üzrə Birgə Proqramının (UNAİDS) Azərbaycan nümayəndəliyinin rəhbəri Cəmilə Cərrahova 1 dekabr - Ümumdünya QİÇS-lə Mübarizə Günü ilə əlaqədar keçirilən mətbuat konfransında deyib. O bildirib ki, İİV-lə yaşayan insanlar arasında Hepatit C-yə yoluxmanın artmasına səbəb bu virusa yoluxan inyeksion narkotik istifadəçilərinin qeyri-steril vasitələrdən istifadə etməsidir: “Azərbaycanda inyeksion narkomanların rəsmi statistikası reallığı əks etdirmir. Bu rəqəm rəsmi statistikadan ən azı 5-7 dəfə çoxdur. İndi Azərbaycanda 16 minə yaxın rəsmi qeydiyyata alınmış inyeksion narkotik istifadəçisi var”.
C. Cərrahova qeyd edib ki, İİV kimi Hepatit C də tam müalicə olunan xəstəlik deyil. Bu xəstəliyin ağır mərhələsində bir kurs müalicənin aparılması 10 min manatdan baha başa gəlir. Azərbaycan Nazirlər Kabinetinin İİV-lə yaşayan insanların müayinə və müalicəsi ilə bağlı 62 saylı qərarında Hepatit C-yə yoluxmuş insanlarla bağlı da bənd var. Lakin hələlik Hepatit C-yə yoluxmuş insanların müalicəsi üçün dövlət tərəfindən vəsait ayrılmır və Hepatit C-yə yoluxan insan şəxsi vəsaiti hesabına müalicə alır.
C. Cərrahovanın sözlərinə görə, heç bir dövlət qurumu bu qədər xərci öz boynuna götürə bilməz: “Ona görə də dünyada qəbul olunmuş praktika Azərbaycanda da tətbiq olunmalıdır. Məncə, bu problemin ən yaxşı həll yolu səhiyyə sahəsində islahatların aparılması və icbari tibbi sığorta sisteminin tətbiq olunmasıdır”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
