Bakı - APA-Economics. Qiymətli Kağızlar üzrə Dövlət Komitəsi (QKDK) 2015-ci ilin I yarısında səhmdar cəmiyyətlərə 90,5 min manat məbləğində cərimə sanksiyası tətbiq edib ki, bu da ötən ilin analoji dövrünün göstəricisindən 44% azdır.
Komitədən "APA-Economics"ə verilən məlumata görə, cari ilin yanvar-iyun aylarında QKDK-ya 239 səhmdar cəmiyyətində səhmdarların hüquqlarının pozulması barədə 138 şikayət daxil olub. Onların sayı ötən ilin analoji dövrü ilə müqayisədə 13%, barələrində şikayət daxil olmuş səhmdar cəmiyyətlərinin sayı 35% azalıb.
Şikayətlər araşdırıldıqdan sonra QKDK 65 halda səhmdar cəmiyyətlərinə ümumilikdə 90,5 min manat məbləğində cərimə tətbiq edilməsinə dair qərar qəbul edib. 2014-cü ilin yanvar-iyun aylarında isə 160,5 min manat məbləğində 99 cərimə tətbiq olunub.
Bundan başqa, 2015-ci ilin birinci yarısında QKDK səhmdar cəmiyyətlərinə aşkar edilmiş nöqsanların aradan qaldırılması barədə icrası məcburi olan 47 göstəriş (2% artım) verib.
Hesabat dövründə 252 səhmdar cəmiyyəti (2% artım) QKDK-ya illik hesabat təqdim edib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
