Bu barədə APA-ya müraciət edən valideynlər bildiriblər ki, övladlarının müalicə olunduğu Elmi-Tədqiqat Hematologiya və Transfuziologiya İnstitutunda Asparginaza, Merkoptopurinol və Sitozar kimi dərmanların çox baha olması və çatışmaması xəstələrin müalicəsini heçə endirir. Bu dərmanlar xəstəliyin müalicəsi üçün əsas dərmanlardan biri hesab olunur. Onlar olmadıqda isə xəstəlik daha da şiddətlənir və nəticədə xəstələrin ölümünə səbəb olur. Valideynlər deyib ki, məsələ ilə bağlı dəfələrlə müraciət etsələr də, onlara heç bir köməklik edilməyib.
Səhiyyə Nazirliyinin Elmi-Tədqiqat Hematologiya və Transfuziologiya İnstitutunun direktoru Sultan Əliyev APA-ya açıqlamasında deyib ki, leykozlu xəstələrinin müalicəsi üçün pulsuz verilən dərmanlarla hər kəsi təchiz etməyə çalışırlar: “Bizə nə verilirsə, onu xəstələr arasında bölüşdürürük. İlbəil həmin dərmanların sayı çoxalır. Lakin təəssüflər olsun ki, leykozlu xəstələrin də sayı ilbəil artır. Buna görə də dərmanlar bir qədər çatışmır. Yaxın günlərdə baş onkoloqla görüş keçiriləcək. O da bizim tələbatımıza yenidən baxacaq və ola bilsin ki, dərmanların sayı çoxaldılsın. Çalışacağıq ki, bütün xəstələrin ehtiyacı ödənilsin. İldən-ilə bu məsələyə, dövlət tərəfindən xüsusi diqqət və qayğı göstərilir və müvafiq işlər görülür. Gələn il dərmanların xəstələrə pulsuz verilməsi üçün ayrılan vəsait yüz faiz artırılacaq. Bu da mövcud məsələnin həllində mühüm rol oynayacaq”.
Bəzi pulsuz verilən dərmanların institutda satılması barədə deyilənlərə gəlincə, S.Əliyev bunları əsassız və yalan informasiya olduğunu deyib: “İnstitutda bunlar heç bir zaman satıla bilməz. Ümumi danışmaq lazım deyil. Əgər konkret faktlar varsa, bu barədə deyilsin və mən də institut direktoru olaraq onlara qarşı mübarizə aparım”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
