Bakı. Fuad Cəfərov - APA. Baş prokuror yanında Korrupsiyaya qarşı Mübarizə İdarəsinin şöbə rəisi beynəlxalq tədbirdə iştirak edib. Baş Prokurorluğun mətbuat xidmətindən APA-ya verilən məlumata görə, Düşənbə şəhərində İqtisadi İnkişaf və Əməkdaşlıq Təşkilatının (OECD) Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planı tərəfindən Tacikistan Respublikasının 3-cü raund dəyərləndirilməsinin monitorinqi keçirilib.
Antikorrupsiya Şəbəkəsinin İstanbul Fəaliyyət Planının layihə rəhbəri və OECD Katibliyinin əməkdaşı, həmçinin Qazaxıstan, Moldova və Litvanın nümayəndələrinin də daxil olduğu monitorinq qrupunda ölkəmizi ekspert qismində Baş prokuror yanında Korrupsiyaya qarşı Mübarizə İdarəsinin Təşkilati və informasiya təminatı şöbəsinin rəisi Rövşən Əliyev təmsil edib.
Monitorinq qrupunun dəyərləndirdiyi əsas istiqamətləri Tacikistan Respublikasının korrupsiyaya qarşı mübarizə siyasəti, korrupsiyanın kriminallaşdırılması, qarşısının alınması və bu sahədə görülmüş digər işlər təşkil edib.
Dəyərləndirmə səfəri çərçivəsində monitorinq qrupunun üzvləri Tacikistan Respublikasının Baş prokuroru, Dövlət maliyyə Nəzarəti və Korrupsiya ilə mübarizə Agentliyinin direktoru, Ombudsman, parlament üzvləri və OECD tərəfindən verilmiş tövsiyələrin icrasına məsul olan dövlət qurumlarının nümayəndələri ilə görüş keçirilmiş və korrupsiyaya qarşı mübarizə sahəsində ölkədə görülmüş işlərə dair dinləmələr aparılıb.
Tacikistan Respublikasının 3-cü raund dəyərləndirilməsi çərçivəsində növbəti görüşün cari ilin aprelində keçirilməsi nəzərdə tutulub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
