Bakı – APA. Bu gün Qafqaz Müsəlmanları İdarəsində (QMİ) Dini Qurumlarla İş üzrə Dövlət Komitəsinin rəhbərliyi ilə birgə müşavirə keçirilib.
QMİ-nin mətbuat xidmətində APA-ya verilən məlumata görə, hər iki qurum rəhbərlərinin iştirakı ilə keçən görüşdə dövlət-din münasibətlərinin inkişaf etdirilməsi istiqamətində görülmüş işlər və nəzərdə tutulan tədbirlər müzakirə edilib.
QMİ sədri Şeyxülislam Allahşükür Paşazadə və Dini Qurumlarla İş üzrə Dövlət Komitəsinin sədri Mübariz Qurbanlı öz çıxışlarında dini icmaların fəaliyyətinin daha da təkmilləşdirilməsi yönündə təkliflərini diqqətə çatdırıblar, icmaların qeydiyyatı və dini vəzifələrə təyinat məsələləri, habelə milli-mənəvi, ənənəvi dini dəyərlərin təbliği və inkişaf etdirilməsi iştiqamətində görüləcək işlər barədə məlumat veriblər.
Görüşdə QMİ sədrinin I müavini Müfti Salman Musayev, QMİ sədrinin müavini, Bakı İslam Universitetinin rektoru Sabir Həsənli, QMİ Elmi-Dini Şurasının sədri, akademik Vasim Məmmədəliyev və Dini Qurumlarla İş üzrə Dövlət Komitəsinin sədr müavini Gündüz İsmayılov çıxış edərək dini icmaların fəaliyyəti ilə bağlı məsələlərdən danışıblar. Çıxışlarda qurumlar arasındakı əməkdaşlıq və işbirliyindən razılıq ifadə olunub, məsləhətləşmələr və məşvərətlərin əhəmiyyətli olduğu xüsusi vurğulanıb.
Görüşdə QMİ sədri və Dövlət Komitəsinin sədri tədbirdə iştirak edən din xadimlərinin suallarını cavablandırıblar və irəli sürülən təkliflərə münasibət bildiriblər. Toplantıda QMİ Qazılar Şurasının üzvləri, bölgələr üzrə səlahiyyətli nümayəndələri iştirak ediblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
