Astara. Ağəddin Babayev - APA. Builki qeyri-sabit hava şəraiti kənd təsərrüfatının digər sahələrinə olduğu kimi arıçılığa da təsirsiz ötüşməyib. Bu sahə ilə məşğul olanlar APA-nın cənub bürosuna məhsuldarlığın ötən illə müqayisədə təxminən yarıbəyarı azaldığını bildiriblər.
Qeyd edək ki, cənub bölgəsində ən iri arıçılıq təsərrüfatları Astara rayonunda yerləşir. Rayonun əksər dağlıq və dağətəyi kəndlərində arıçılıq əhalinin başlıca məşğuliyyətini və təsərrüfatın aparıcı sahəsini təşkil edir.
Astara Arıçılar Cəmiyyətinin rəhbəri Arif Nəzirov bir neçə gündür ki, rayonda bal süzümünə başlandığını deyib. Cəmiyyətin sədri təsərrüfatlarda bal yığımının keçən ilə nisbətən bu il zəif olmasının səbəbini havaların qeyri-sabit keçməsi, intensiv yağıntıların düşməsi ilə əlaqələndirib: ”Arılar quraqlığı sevir. Nəmlik olanda arı inkişaf edə bilmir. Yağışlı havada ümumiyyətlə, çölə çıxmır, əgər çölə çıxarsa məhv olur”.
Arıçı Tural Hidayətovun sözlərinə görə, keçən illə müqayisədə bu il məhsul istehsalında zəiflik var. Bu da havaların yağıntılı keçməsi ilə əlaqədardır: “Keçən il 80 arı ailəsindən 1,5 ton məhsul götürmüşdük. Bu il bu rəqəm bir qədər az olacaq”.
Astara Rayon Statistika İdarəsindən APA-nın cənub bürosuna verilən məlumata görə, hazırda rayonda 9738 arı ailəsi var. Arıçılıqla məşğul olan təsərrüfatların sayı 1024-dür. Keçən il rayon üzrə 95 ton bal istehsal olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
