Bakı Ağır Cinayətlər Məhkəməsində "Azərbaycan Dövlət Televiziya və Radio Verilişləri"QSC-nin sədri Arif Alışanovu öldürməyə cəhddə, ona qarşı dələduzluq etməkdə və digər cinayətlərdə təqsirləndirilən Şücayət Əkbərov, Qoçalı Cəbiyev, Zöhrab Şirinov və Aqşin Hüseynovun barəsində olan cinayət işi üzrə məhkəmə iclası davam etdirilib.
APA-nın məlumatına görə, hakim Əfqan Hacıyevin sədrlik etdiyi iclasda təqsirləndirilən Şücaət Əkbərov vəsatətlə çıxış edərək şəkər xəstəsi olduğunu, ayağının çürüdüyünü deyib. O, barəsində tibbi ekspertiza keçirilməsini istəyib. Məhkəmə vəsatəti təmin etməyib.
İclasda məhkəmə istintaqı başlayıb. Dövlət ittihamçısı ittiham aktını elan edib.
İttihama münasibət bildirən təqsirləndirilən şəxslər özlərini təqsirli bilməyiblər.
Ş. Əkbərov ifadəsində bildirib ki, A. Alışanovu 2007-ci ildən tanıyır: "Gəlib Şamaxıda torpaq alırdılar. Mən yeri tapırdım və vasitəçilik edirdim. Arif Alışanov özü torpağa baxırdı, sonra alqı-satqı olurdu. Mən tək Arif Alışanovla yox, çox adamla alver etmişəm. Heç birində problem olmayıb. Arif Alışanovun kürəkəni Fərid də torpaq almışdı. Onlar boşananda Fəridi polislə gətirdilər və bütün əmlakı adından çıxarıb Alışanovun qızının adına keçirdilər. Arif Alışanov torpaq almasını gizli saxlayırdı. Çox vaxt maşından düşmürdü, torpaq sahibi ilə görüşmürdü".
Ş. Əkbərov Arif Alışanovun MTN əməkdaşları vasitəsilə ona təzyiq etdiklərini deyib: "Arif Alışanov MTN-in adamı idi. Mən şahid adı çəkmirəm. Lazım olanda şahidlərimi gətirəcəm. Kim olsa soruşar ki, aldığın torpağın sənədi hanı? Mən onu necə aldada bilərəm? Mən heç əsgərlikdə silah istifadə etməmişəm. Nəyimə lazımdır avtomat? Mənim Arif Alışanovu öldürmək fikrim olmayıb. Mən onu öldürüb nəyə nail olacaqdım? Gəlirdi torpaq alırdı, pul qazanırdım. Əməliyyat olunanda mənə kömək edib. Nə ziyanı olub ki, öldürəm?"
Proses martın 14-də davam etdiriləcək.
***
11:55
Bu gün Bakı Ağır Cinayətlər Məhkəməsində "Azərbaycan Dövlət Televiziya və Radio Verilişləri"QSC-nin sədri Arif Alışanovu öldürməyə cəhddə, ona qarşı dələduzluq etməkdə və digər cinayətlərdə təqsirləndirilən Şücayət Əkbərov, Qoçalı Cəbiyev, Zöhrab Şirinov və Aqşin Hüseynovun barəsində olan cinayət işi üzrə məhkəmə iclası davam etdirilib.
APA-nın məlumatına görə, hakim Əfqan Hacıyevin sədrlik etdiyi iclasda təqsirləndirilən Şücayət Əkbərov vəsatətlə çıxış edərək Arif Alışanovun məhkəmə baxışında iştirak etməsini istəyib. O, A. Alışanov və onun qızı Nigar Alışanova, həmçinin sürücülərinin məhkəmə iclasında iştirakının təmin edilməsinə görə prosesin təxirə salınmasını istəyib.
Məhkəmə vəsatəti təmin etməyib.
Hakim bildirib ki, A. Alışanov iddia ərizəsi ilə məhkəməyə müraciət edib. A. Alışanov 4 milyon 500 min manat məbləğində dəymiş ziyanın təqsirləndirilən Şücayət Əkbərov tərəfindən ödənilməsini istəyib.
Məhkəmə iddia ərizəsini icraata qəbul edib.
Qeyd edək ki, təqsirləndirilən şəxslər Cinayət Məcəlləsinin 29,120-ci (qəsdən adam öldürməyə cəhd), 178-ci (dələduzluq) və digər maddələrinə əsasən ittiham olunurlar.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
