Sahibkarlıq

Ana səhifə

Sahibkarlıq

Şahin Mustafayev: “Azərbaycan-İran əlaqələri yeni inkişaf mərhələsinə qədəm qoyub”

20 oktyabr 2015 15:29 (UTC +04:00)

Bakı. Yeganə Laçınzadə - APA-Economics. Oktyabrın 20-də iqtisadiyyat və sənaye naziri, Azərbaycan ilə İran İslam Respublikası arasında iqtisadi, ticarət və humanitar sahələr üzrə Dövlət Komissiyasının həmsədri Şahin Mustafayev İran İslam Respublikasının Şərqi Azərbaycan vilayətinin valisi İsmayıl Cabbarzadənin rəhbərlik etdiyi nümayəndə heyəti ilə görüşüb.

İqtisadiyyat və sənaye nazirliyindən “APA-Economics”ə verilən xəbərə görə, görüşdə nazir Şahin Mustafayev Azərbaycan və İran arasında siyasi və iqtisadi əlaqələrin inkişaf etdiyini, ölkələrimizin əməkdaşlığın daha da genişləndirilməsində maraqlı olduğunu qeyd edib, ötən il dövlət başçılarının qarşılıqlı rəsmi səfərlərindən və keçirilən görüşlərdən sonra Azərbaycan-İran əlaqələrinin yeni inkişaf mərhələsinə qədəm qoyduğunu vurğulayıb.

Qeyd edilib ki, Azərbaycanla İran İslam Respublikası arasında iqtisadi, ticarət və humanitar sahələr üzrə Dövlət Komissiyasının fəaliyyəti də ölkələrimiz arasında iqtisadi münasibətlərin inkişafına öz töhfəsini verir. Bu yaxınlarda Azərbaycanın və İranın Astara şəhərlərində keçirilmiş görüşlər zamanı Şimal-Cənub nəqliyyat dəhlizi ilə bağlı dəmir yolu xətlərinin əlaqələndirilməsinə, Biləsuvar və Astara sərhəd-keçid məntəqələrinin 24 saat fasiləsiz işləməsinə və digər məsələlərə dair razılıqlar əldə olunub. Şimal-Cənub nəqliyyat dəhlizinin fəaliyyətinin təkmilləşdirilməsi Şərqi Azərbaycan vilayəti üçün də əhəmiyyətli olacaq.

Ölkələr arasında iqtisadiyyatın müxtəlif sahələrində, o cümlədən neft, enerji, nəqliyyat, ticarət, sənaye, turizm, səhiyyə və təhsil sahələrində əməkdaşlığın uğurla davam etdiyini qeyd edən Şahin Mustafayev kənd təsərrüfatı, logistika və s. sahələrdə əməkdaşlıq üçün geniş potensialın olduğunu vurğulanıb.

Görüşdə nazir Şahin Mustafayev Ermənistan-Azərbaycan, Dağlıq Qarabağ münaqişəsi ilə bağlı ölkəmizin ədalətli mövqeyini bir daha diqqətə çatdırıb.

İran İslam Respublikasının Şərqi Azərbaycan vilayətinin valisi İsmayıl Cabbarzadə dövlət başçılarının birgə səyləri nəticəsində ölkələrimiz arasında əlaqələrin genişləndiyini, əməkdaşlığın daha da inkişafı üçün böyük potensialın olduğunu qeyd edib. Azərbaycan-İran iqtisadi əlaqələrinin inkişafı istiqamətləri barədə fikirlərini bölüşən İ. Cabbarzadə neft, sənaye, kənd təsərrüfatı, turizm sahələrində əməkdaşlıq perspektivlərindən danışıb.