Fövqəladə Hallar Nazirliyi, SOCAR və Azərbaycan Sənaye Təhlükəsizliyi Assosiasiyası (AISA) arasında sənayedə təhlükəsizlik, əməyin mühafizəsi və ətraf mühitin qorunması sahəsində birgə əməkdaşlığa dair anlaşma memorandumuna əsasən Bakı Konqres Mərkəzində neft-qaz və sənaye sahəsində tətbiq olunan texniki-normativ sənədlərin təkmilləşdirilməsinə dair dəyirmi masa keçirilib.
"APA-Economics" xəbər verir ki, tədbirin keçirilməsində əsas məqsəd neft-qaz və neft-kimya sənayesində tətbiq olunan texniki-normativ sənədlərin praktiki icra vəziyyətinin qiymətləndirilməsi və onların müasir texnoloji tələblərə uyğun təkmilləşdirilməsi üzrə təkliflərin formalaşdırılması olub.
Tədbirdə Azərbaycan Respublikasının Nazirlər Kabinetinin, Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi, Azərbaycan Nəqliyyat və Kommunikasiya Holdinqi (AZCON) və Azərbaycan Standartlaşdırma İnstitutu nümayəndələri iştirak edib.
Dəyirmi masada açılış nitqi ilə çıxış edən FHN Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin rəisi müavini İsmayıl Nəsirov sənaye təhlükəsizliyinin yalnız texniki məsələ olmadığını, dayanıqlı inkişafın və ən əsası – insan həyatının qorunmasının əsas prinsiplərindən biri olduğunu qeyd edib: “Bu baxımdan Azərbaycan Respublikasının Prezidenti İlham Əliyev tərəfindən müəyyən edilmiş strateji inkişaf kursuna uyğun olaraq ölkədə sənayedə, o cümlədən neft-qaz və neft-kimya sənayesində təhlükəsizliyin daim yüksəldilməsi, risklərin minimuma endirilməsi və bu sahədə müasir texnologiyaların tətbiqi əhəmiyyətli rol oynayır. Fövqəladə Hallar Nazirliyi mövcud texniki-normativ sənədlərə uyğun olaraq bu istiqamətdə ardıcıl fəaliyyət həyata keçirir”.
Tədbirdə çıxış edən Azərbaycan Sənaye Təhlükəsizliyi Assosiasiyasının İdarə Heyətinin sədri Orxan Xəlilzadə neft-qaz və neft-kimya sənayesində tətbiq olunan texniki-normativ sənədlərin durmadan yenilənən texnoloji nailiyyətlərə uyğunlaşdırılmasının vacibliyini vurğulayıb.
Müvafiq dövlət qurumlarının nümayəndələrinin də iştirak etdiyi dəyirmi masada sənaye müəssisələrinin praktiki təcrübəsi, həmçinin təzyiq altında işləyən qurğular, texnoloji boru kəmərləri, qoruyucu klapanlar, buxar və qaynar su boru kəmərləri, neft-kimya avadanlıqlarının texniki istismarı, neft-qaz zavodlarının təhlükəsizlik qaydaları və digər aidiyyəti sahələr ilə bağlı mövcud normativ sənədlərin tətbiqi məsələləri müzakirə edilib, təkliflər səsləndirilib.
***
10:35
Bakıda Texniki Normativlərin Təkmilləşdirilməsi üzrə dəyirmi masa keçirilir.
"APA-Economics" xəbər verir ki, tədbir Fövqəladə Hallar Nazirliyi (FHN), Azərbaycan Dövlət Neft Şirkəti (SOCAR) və Azərbaycan Sənaye Təhlükəsizliyi Assosiasiyasının (AISA) təşkilatçılığı ilə baş tutur.
Dəyirmi masada Azərbaycan Respublikası Nazirlər Kabineti, Azərbaycan Respublikası Fövqəladə Hallar Nazirliyi, Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi, SOCAR, Azərbaycan Nəqliyyat və Kommunikasiya Holdinqi (AZCON), BP, Azərbaycan Sənaye Təhlükəsizliyi Assosiasiyası, Azərbaycan Respublikası Sahibkarlar (İşəgötürənlər) Təşkilatları Konfederasiyası, Azərbaycan Tikinti İstehsalçıları Assosiasiyasının nümayəndələri iştirak edirlər.
Tədbirdə Təzyiq altında işləyən qabların təhlükəsiz istismarı Qaydaları, Təzyiq altında işləyən texnoloji boru kəmərlərinin istismarı və təmiri Qaydaları, Yaylı qoruyucu klapanların istismarı, təftişi və təmiri haqqında rəhbər göstərişlər, Neft emalı və neft-kimya sənayesində avadanlıqların planlı-xəbərdaredici təmiri haqqında Əsasnamə (Hissə 1), Neft, qaz və neft-kimya sənayesində təzyiq altında işləyən qabların quruluşu və texniki təhlükəsizlik Qaydaları (2015), Buxar və isti su boru kəmərlərinin quruluşu və təhlükəsiz istismarı Qaydaları, Yüksəktəzyiqli qablar və boru kəmərləri üzrə normativ tələblər, Mineral gübrələr istehsal edən müəssisələrin texnoloji avadanlıqlarına texniki xidmət və təmir sisteminə dair tələblər, Neft, qaz və neft-kimya sənayesində yanğın təhlükəsizliyi Qaydaları, Azərbaycan neft sənayesində əməyin mühafizəsinin vahid idarəetmə sistemi, Neft-qaz emalı zavodlarının istismarı zamanı təhlükəsizlik Qaydaları kimi sənədlərin müzakirəsi aparılacaq.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
